БМТ Исроилга қурол етказиб беришни тўхтатишни талаб қилди

Бир гуруҳ Бирлашган Миллатлар Ташкилоти экспертлари Исроилнинг Ливанга уюштирган ҳужумини қоралади ва БМТга аъзо давлатларни Исроилга барча турдаги қуролларни етказиб беришни тўхтатишга чақирди. Бу ҳақда кеча, 15 апрель куни 19 нафар эксперт томонидан эълон қилинган баёнотда сўз боради.

Экспертлар жорий йилнинг 8 апрель куни Исроилнинг Ливан бўйлаб амалга оширган ва Ливан расмийларига кўра 350 дан ортиқ кишининг (жумладан, 30 нафар боланинг) ҳаётига зомин бўлган даҳшатли ҳужумларига тўхталган.

“Бу ўзини ҳимоя қилиш эмас. Бу БМТ Низомининг очиқдан-очиқ бузилиши, тинчлик истиқболларини қасддан йўқ қилиш ҳамда кўп томонламалик ва БМТга асосланган халқаро тартибга нисбатан ҳақоратдир”, дейилади баёнотда.

БМТ Инсон ҳуқуқлари бўйича кенгаши маълумотига кўра, улар Исроилни “Ливандаги барча ҳарбий амалиётларни тўхтатишга” чақирган ва “халқаро гуманитар ҳуқуқ ҳамда инсон ҳуқуқларининг жиддий бузилиши ҳақида ишончли далиллар мавжуд бўлган бир пайтда” аъзо давлатларни Исроилга қурол етказишни тўхтатишга ундаган.

Маълумот учун, Исроил Ливан бўйлаб вайронкор бомбардимонлар ва жанубда қуруқликдаги босқинни амалга ошириб, 2000 дан ортиқ одамнинг ўлимига ва 1,2 миллиондан ортиқ кишининг мажбурий кўчирилишига сабаб бўлди.

БМТ экспертлари тинч аҳолининг бундай мажбурий кўчирилиши “инсониятга қарши жиноят” эканини айтмоқда. Шунингдек, улар Исроил томонидан уй-жойларнинг, айниқса жанубдаги шиалар яшайдиган ҳудудларда мақсадли вайрон қилинишини “жамоавий жазолашнинг бир шакли” ва “этник тозалашдан далолат берувчи” ҳаракат сифатида қоралаган.

Исроилнинг Ливанни бомбардимон қилишда давом этаётгани АҚШ-Эрон музокараларидаги кескинлик нуқтаси бўлиб қолмоқда. Теҳрон Ливан ҳам жорий сулҳ доирасига киритилиши кераклигини айтган. Исроил Бош вазири Биньямин Нетаньяху эса Ливан Эрон билан тузилган сулҳнинг бир қисми эмаслигини ва Исроил “қаерда талаб этилса”, “Ҳизбуллоҳ”ни нишонга олишда давом этишини билдирган.

Эслатиб ўтамиз, аввалроқ Ливан ва Исроил расмий вакиллари Вашингтонда тўғридан тўғри музокаралар ўтказиш учун учрашганди. Бу расман уруш ҳолатида бўлган икки давлат ўртасида 1993 йилдан бери ўтказилаётган биринчи сиёсий музокара ҳисобланади. Шунингдек, Дональд Трамп 34 йил ичида илк бор Исроил ва Ливан етакчилари музокаралар ўтказишини эълон қилди.