Британия Қирғизистон компанияларини “қора рўйхат”га тиқди

Буюк Британия “Россия санкцияларни айланиб ўтиш учун фойдаланаётган” 15 та компания ва уч нафар жисмоний шахсга нисбатан санкциялар жорий қилди. Бу ҳақда Британия ҳукуматининг пресс-релизига таяниб, “24.kg” хабар берди.

Янги санкциялар пакети криптовалюта айирбошлаш шохобчалари ва “A7” тармоғига қарши қаратилган. Форин-офис (Британия Ташқи ишлар вазирлиги) ҳисоблашича, ушбу тармоқ маблағларни Россия ҳарбий иқтисодиётига йўналтириш учун Қирғизистон молия тизимларидан фойдаланади. Ўтган йил давомида мазкур тармоқ орқали 90 миллиард доллар ўтган.

Расмий Лондоннинг баёнотига кўра, “Евроосиё жамғарма банки” ОАЖ Россия ҳукумати учун стратегик жиҳатдан муҳим бўлган молиявий хизматлар секторида фаолият юритаётган шахсларга молиявий хизматлар кўрсатгани сабабли чекловлар остига тушган. Банкка нисбатан энг қатъий чоралар пакети жорий этилган: активларни музлатиш ва директорларнинг ишлашини тақиқлашдан ташқари, Британия тузилмаларига ушбу банк билан вакиллик муносабатларига киришиш ва ҳар қандай тўловларни амалга ошириш тақиқланган.

“Давлат брокерлик компанияси” ОАЖ ва “Эмитент виртуальных активов” ОАЖ Британия расмийлари томонидан Россия ҳукуматидан манфаатдор бўлганликда ёки иқтисодий жиҳатдан муҳим фаолият орқали уни қўллаб-қувватлаганликда айбланмоқда. Ушбу ташкилотлар учун активларни музлатиш ва траст хизматларига чекловлар кўзда тутилган. Бундан ташқари, “Эмитент виртуальных активов”га нисбатан махсус интернет-санкциялар жорий этилган: Британия провайдерлари, ижтимоий тармоқлари ва иловалар дўконлари Буюк Британия ҳудудида фойдаланувчиларнинг ушбу тузилма контенти ва сервисларига киришини чеклашга мажбур.

Санкциялар рўйхатига, шунингдек, Россияга аввал жорий этилган чеклов ва тақиқларни айланиб ўтишда кўмаклашаётган Грузиянинг учта компанияси ҳам киритилган.

Эслатиб ўтамиз, Украинага бостириб кириши ортидан Россияга қарши жорий этилган чекловларни айланиб ўтишдаги шубҳалар сабабли, бошқа давлатлар компаниялари ҳам Европа Иттифоқи ва АҚШ санкцияларига дучор бўлмоқда. Хусусан, Қирғизистонда бу ҳолат бир нечта банкларга ҳам таъсир қилди. Мамлакат расмийлари Россия Федерациясига чекловларни айланиб ўтишда ёрдам бермаётганликларини ва қоидаларни бузаётган тадбиркорларга қарши курашаётганликларини билдирмоқда. Шунингдек, Қирғизистон Республикаси Адлия вазирлиги санкция хавфи юқори бўлган операцияларга аралашиб қолган 50 та юридик шахснинг фаолиятини бир вақтнинг ўзида тугатиш тўғрисида буйруқ чиқарган.