Бухорода 20 ёшли йигитнинг ошқозонидан 5 тўғноғич ва 6 мих олиб ташланди

Бухоро вилоятида 2005 йилда туғилган йигитнинг қорнидан 5 дона металсимон тўғноғич ва 6 дона мих олиб ташланди. Бу ҳақда Республика шошилинч тиббий ёрдам илмий маркази Бухоро филиали хабар берди.

Қайд этилишича, марказнинг Бухоро филиалига 2005 йилда туғилган бемор кўнгил айниши, эпигастрал соҳасидаги кучли оғриқ ва овқат ўтишининг қийинлашишидан шикоят қилиб мурожаат қилган. Йигит 2 кун олдин кўп тўғноғич ва мих ютганлигини билдирган.

“Бемор психиатр назоратида рўйхатда туради”, дея қўшимча қилинган хабарда.

Унга кўра, йигитда ўтказилган рентгенография текширувида ошқозон ва 12 бармоқли ичакда кўп сонли металсимон ёт жисмлар, ФГДС текшируви орқали ошқозоннинг пилорик қисмида катта эгрилигида металсимон кўп сонли 2Х5 см ли металсимон тўғноғич ва михлар борлиги аниқланган.

Шундан сўнг, беморда зудлик билан эндоскопик амалиёт усули муваффақиятли бажарилган. 

“Махсус эндоскопик қисқич ва махсус эндоскопик илгаклар ёрдамида босқичма-босқич 5 дона металсимон тўғноғич ва 6 дона мих ёт жисмлари бемор ошқозони ва 12 бармоқли ичак бўшлиғидан олиб ташланди”, дейилади хабарда.

Шунингдек, ҳозирда беморнинг аҳволи ижобий томонга ўзгариб, ошқозон ичак трактидаги паталогик муаммолар бартараф қилингани билдирилган.

Эслатиб ўтамиз, аввалроқ фарғоналик 2 ёшли қизнинг қорнидан 135 та магнит шарча олинган эди. Қизалоқ магнит шарчалар билан ўйнаб келган ва шу жараёнда улардан анча-мунчасини ичига ютган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган. Шифокорлар жарроҳлик амалиёти ўтказиб, қизалоқ қорнидаги 135 та магнит шарчани олиб ташлаган.