Даҳшат уйи: Дурдонанинг қотиллари яна бир ўзбекистонликни ўлдиргани аниқланди (видео)

Аввалроқ, Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилгани ҳақида хабар берилган эди. Мазкур иш доирасида у ўлдирилган Умраниедаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди. Бу ҳақда “evrensal” хабар берди.

Нашрнинг ёзишича, 2025 йил 28 декабрь куни Ўзбекистондан Туркияга борган 32 ёшли Сайёра Эргашалиевадан 23 январдан буён яқинлари хабар ололмаган. Полицияга тушган мурожаатдан сўнг олиб борилган текширувларда Сайёра охирги марта Дурдона Ҳакимова бўлаклаб ўлдирилган уйда яшагани маълум бўлган. Кузатув камераларини ўрганган терговчилар 23 январь куни Сайёра уйга кирганини, унинг ортидан эса Д.А.У.Т. (31) ва Г.А.К. (29) ҳам шу манзилга кирганини аниқлаган.

Текширув давомида Сайёра Эргашалиева ва Дурдона Ҳакимова Д.А.У.Т. ҳамда Г.А.К. билан қарийб бир ой давомида бир уйда яшагани, С.Э. ва Г.А.К. эса ўзаро муносабатда бўлгани аниқланган.

Полиция хавфсизлик камераларини кўздан кечириб, 24 январь куни гумонланувчилар уйдан бир неча бор чиқинди қоплари билан чиқиб кетганини, сўнг оқ рангли чамадон билан манзилни тарк этганини қайд этган. Уларнинг тижорат таксисида Фотиҳ туманига боргани, чамадондаги жасад бўлакларини ахлат контейнерига ташлагач, пиёда Еникапи Мармарай бекатига йўл олгани аниқланган.

Тергов жараёнида Дурдона Ҳакимова қотиллиги бўйича ҳибсда бўлган Д.А.У.Т. ва Г.А.К. билан ўтказилган сўроқларда Сайёра Эргашалиева ҳам 23 январь куни айни уйда совуқ қурол билан ўлдирилгани, жасади бўлакланиб турли ахлат контейнерларига ташлаб юборилгани маълум бўлган. Прокурор кўрсатмасига асосан жазони ижро этиш муассасасидан олиб чиқилиб, яна қўлга олинган икки гумонланувчиларга нисбатан “қасддан одам ўлдириш” моддаси бўйича жиноят иши қўзғатилган. Ички ишлар идорасидаги тергов ҳаракатларидан сўнг уларнинг эртага, 13 февраль куни судга олиб борилиши кутилмоқда.

Эслатиб ўтамиз, аввалроқ Эргашалиева Сайёранинг бедарак йўқолгани, ота-онаси уни топиш мақсадида Туркияга боргани ҳақида хабар берилган эди.

Ваҳший қотиллик

Жорий йилнинг 24 январь куни кечаси Истанбулнинг Шишли тумани Дуатепе маҳалласида даҳшатли воқеа содир бўлди. Маҳаллий вақт билан соат тахминан 19:40 ларда ҳудудда чиқинди йиғиш ва қоғоз териш билан шуғулланиб юрадиган Окан исмли шахс Куюлубоғ кўчаси, 25-уй олдидаги ахлат контейнерини ковлар экан, чойшаб ва пакетларга ўралган жасадни пайқаб қолган. У ҳолат ҳақида хабар бериш учун полиция бўлимига бориб, кўрганларини айтиб берган.

Оканнинг айтишича, у ҳодиса вақтида контейнерни кавлаётганида қора пакетни кўрган, пакетни йиртганида қон ва инсон жасадига кўзи тушган ҳамда жасад ҳали иссиқ эканини сезган. Шундан сўнг Ферикўй полиция бўлимига бориб ҳолатни маълум қилган, полиция ходимлари ҳам воқеа жойига келиб, жасадни контейнер ичида кўрган. У полиция билан бирга яна ҳодиса жойига қайтган. Дастлабки кўздан кечиришда жасаднинг боши кесилган бўлиб, аёл кишига тегишли экани тахмин қилинган.

Қотиллик бўлими детективлари олиб борган текширувлар давомида яна бир гувоҳнинг кўрсатмаси олинган. Гувоҳнинг айтишича, соат 19:00 лар атрофида у онасини кўриш учун мазкур кўчага келган ва шу пайтда ахлат контейнери олдида соқолли икки эркакнинг чамадон билан кутиб турганини кўрган.

Шунингдек, гумонланувчиларнинг жасадни чамадон ичида олиб келиб ташлаган лаҳзалари акс этган кузатув камераси тасвирлари ҳам аниқланган. Кадрларида икки шахс қўлларида чамадон билан контейнер ёнига келаётгани кўринади.

Детективлар ҳодиса жойида олиб борган ишлар чоғида жасаднинг танаси солинган контейнерда бош ва оёқлар йўқлигини аниқлаган. Жасад солинган деб тахмин қилинган чамадон эса бир неча кўча наридаги Бозкурт кўчасидаги бошқа ахлат жойидан топилган.

Ҳодиса жойи бузилмаслиги учун жасад контейнердан чиқарилмаган, шу сабабли тананинг тўлиқ ҳолати жойида батафсил баҳоланмаган. Ҳудуд хавфсизлик ҳалқасига олиниб, Қотиллик бўлими ва Ҳодиса жойини кўздан кечириш бўлимига хабар берилган ва кенг қамровли тергов бошланган.

Жамоат хавфсизлиги бўлими ходимлари томонидан ўтказилган текширувлар натижасида бармоқ изи орқали аёлнинг шахси аниқланган. У Ўзбекистон фуқароси Дурдона Ҳакимова экани маълум бўлган. Жасад кўздан кечирилганда унинг устида қора рангли куртка, қора рангли узун енгли свитшот, қора ички кийим бўлгани ва оқ чойшабга ўралган ҳолатда экани аниқланган. Марҳуманинг шахси бармоқ изи орқали тасдиқланган.

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган.

Қотилликни содир этган Д.Т. кўрсатма берган.

“Дурдона Ҳакимова билан воқеа куни танишганмиз, орамизда муносабат бошланган. Жанжаллашиб қолдик ва мен уни пичоқ билан ўлдирдим. Кейин дўстим билан бирга жасадни бўлакларга ажратдик. Жасад қисмларини алоҳида пакетлаб, чамадон ичига жойладик. Сўнг тижорат таксиси билан Шишли туманига келдик ва жасад ҳамда унинг қисмларини турли ахлат контейнерларига ташлаб юбордик”, дейди у.

Гумонланувчиларнинг аэропортдан қочишга уринган пайтда қўлга олинган лаҳзалари ҳам тасвирларга тушган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.

Мазкур воқеа ортидан 26 январь куни аёллар Туркиянинг Анқара ва Истанбул шаҳрида қотиллик ва жазосизлик сиёсатига қарши норозилик акцияси ўтказди.