Директор ўқувчисига “тарбия мақсадида” шаҳвоний шилқимлик қилди

Тошкент вилоятининг Юқори Чирчиқ туманида Telegram орқали вояга етмаган ўқувчи қизга жинсий мазмундаги хабарлар юборган 39 ёшли мактаб директори 5 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, 1987 йилда туғилган Ж.И. жорий йилнинг 16 ва 17 апрель кунлари вояга етмаган ўқувчи қизга Telegram орқали жинсий мазмундаги SMS-хабарлар юборган. 

Кеча, 22 апрель куни Жиноят ишлари бўйича Юқори Чирчиқ туман судида мазкур иш кўриб чиқилган. Унда директор айбига иқрор бўлган. Бироқ у бу хабарларни “тарбия мақсадида” юборганини билдириб, суддан енгиллик сўраган. Ўқувчи қизнинг онаси эса директорнинг лавозимига нолойиқ эканини айтиб, суддан оғирроқ жазо беришни сўраган.

Суднинг қарори билан Ж.И. Маъмурий жавобгарлик тўғрисидаги кодекснинг 41-1-моддасида (шаҳвоний шилқимлик қилиш) назарда тутилган ҳуқуқбузарликни содир этганликда айбдор деб топилган. Унга 5 сутка маъмурий қамоқ жазоси тайинланган.

Эслатиб ўтамиз, аввалроқ Тошкент вилоятининг Чирчиқ шаҳрида автобусда вояга етмаган қизга шилқимлик қилган эркак 10 суткага қамалганди.