Энди чўчқалар одамларга донорлик қилиши мумкин

Япониядаги PorMedTec стартапи 2027 йилга бориб одамлар учун орган кўчириб ўтказиш мақсадида клонланган чўчқаларни (оддий табиий йўл билан туғилмаган, балки генетик жиҳатдан айнан бир хил нусха сифатида сунъий лаборатория шароитида яратилган чўчқа) етиштирадиган фермани очишни режалаштирмоқда. Бу ҳақда “Nikkei Asia” хабар берди.

Қайд этилишича, PorMedTec Америка биотехнология компанияси eGenesis билан ҳамкорликда оддий чўчқаларнинг ҳужайраларидан фойдаланиб, клонланган ҳайвонлар яратади. Органлар инсон организми томонидан рад этилиш хавфини камайтириш учун бу биологик материал аввалдан генетик жиҳатдан ўзгартирилади.

Ферма Осака шаҳрида жойлашади ва йилига тахминан 100 та чўчқани етиштириш режалаштирилган. Ҳайвонлар керакли ўлчамга етгач, тиббиёт марказларига органларини олиш учун жўнатилади. Фермада замонавий ускуналар, жумладан, сунъий интеллектга эга кузатув камералар ўрнатилиб, чўчқаларнинг тана ҳарорати ва бошқа биологик кўрсаткичлари доимий назорат қилинади.

Нашрга кўра, донор органлар етишмовчилиги шароитида одамлар учун чўчқа органларидан фойдаланиш мумкин, чунки уларнинг ўлчами инсон органларига жуда яқин. Ўтган йилнинг февраль ойида Меижи университети (eGenesis лойиҳаси эгаси) стартап ва eGenesis компаниялари Японияда биринчи марта одам орган трансплантацияси учун учта клонланган чўчқа яратганини эълон қилганди. 

Шунингдек, ўтган йилнинг ноябрь ойида япон компанияси чўчқанинг буйрагини маймунга муваффақиятли кўчириб ўтказган.

Маълумот учун, PorMedTec лойиҳаси 2017 йилда Меижи университети томонидан ишга туширилган бўлиб, унинг мақсади регенератив тиббиётда янги авлод материалларини яратиш орқали жаҳон тиббиётига ҳисса қўшишдан иборат.

Эслатиб ўтамиз, аввалроқ Хитой олимлари дунёда илк бор инсонга чўчқанинг ўпкасини кўчириб ўтказганди. Тажриба Гуанчжоудаги тиббиёт марказида ўтказилган. Ҳайвонда CRISPR технологияси (бактериялар ва архейларнинг табиий иммун тизимига асосланган DNʼни аниқ таҳрирлаш технологияси) ёрдамида ўзгартирилган олти ген мавжуд бўлган.