Эпштейн иши: Клинтонлар судда кўрсатма беради

АҚШнинг собиқ президенти Билл Клинтон ва собиқ давлат котиби ҳамда биринчи хоними Хиллари Клинтон педофил молиячи Жеффри Эпштейннинг жиноий иши бўйича Вакиллар палатасида кўрсатма беришга келишиб олди. Бу ҳақда NBC News хабар берди.

Клинтонлар аслида аввалроқ, ўтган йили кўрсатма беришлари керак эди, аммо бу кейинга қолдирилганди. Жуфтлик энди 26 ва 27 февраль кунлари Нью-Йоркда АҚШ парламенти қуйи палатасининг Назорат қўмитаси олдида кўрсатма беради. Қўмитанинг Эпштейн тергови бўйича кўрсатмаларининг аксарияти Вашингтонда бўлиб ўтган бўлса-да, қўмита Клинтонлар учун истисно қилди.

Шуни таъкидлаш керакки, Клинтонлар Эпштейн иши бўйича кўрсатма беришга рози бўлганлиги ҳақидаги хабар 3 февраль куни тарқалган эди. Ундан олдин улар бирон бир кўрсатма беришдан бош тортган. 

АҚШ Адлия вазирлиги Эпштейн ишининг очилиши тўғрисидаги қонун қабул қилинганидан бери у билан боғлиқ миллионлаб саҳифали файлларни эълон қилди. Ўтган йил охирида эълон қилинган биринчи рўйхатда Билл Клинтоннинг фотосуратлари бор эди. Клинтоннинг матбуот котиби Анхел Урена собиқ президент 2000 йилларнинг бошларида, шармандали молиячи жинсий жиноятларда айбланмасдан олдин, Клинтон жамғармасига сафарлар учун Эпштейн самолётида учганини даъво қилди. Билл Клинтон ҳар қандай қонунбузарликни рад этди ва илгари 2006 йилда вояга етмаган билан жинсий алоқада бўлганликда айбланмасдан олдин Эпштейн билан алоқаларини узганини айтди. Хиллари Клинтон билан боғлиқ ғалваларда эса унинг матбуот котиби Ник Меррилл Хиллари Клинтоннинг бунга нима алоқаси борлигини аниқ билмаслигини айтди.

Эслатиб ўтамиз, аввалроқ Бирлашган Миллатлар Ташкилоти Эпштейн файлларида инсониятга қарши жиноят аломатлари мавжуд эканини маълум қилганди.