Эркак пул олиш учун банкка синглисининг скелетини олиб борди (видео)

Ҳиндистонда бир эркак вафот этган синглисининг ҳисобидаги пулларни олиш учун унинг суякларини банкка олиб борди. Бу ҳақда “India Today” хабар берди.

Қайд этилишича, Дианали қишлоғида яшовчи 55 ёшли Житу Мудну аввалроқ бир неча бор “Грамин” банкига мурожаат қилиб, синглиси Калранинг ҳисобида бўлган 211 долларни нақдлаштиришга ҳаракат қилган. Аёл шу йилнинг январь ойи охирида вафот этган ва ҳеч қандай меросхўр қолдирмаган, шу сабабли пуллар қонуний равишда унинг акасига тегишли бўлган.

Шу вақт ичида банк ходимлари меросхўрдан ўлим ҳақидаги гувоҳнома ёки бошқа тасдиқловчи ҳужжат талаб қилган. Бироқ саводсизлиги туфайли эркак ундан нима талаб қилинаётганини тушунмаган ва синглисининг қабрини кавлаган.

“Мен бир неча марта банкка бордим, у ерда эса пулларни олиш учун ҳисоб рақами эгасини олиб келишим кераклигини айтишди. Унинг вафот этганини айтсам ҳам қулоқ солишмади ва уни банкка олиб келишимни талаб қилишди. Ноиложликдан қабрни кавладим ва унинг ўлганига далил сифатида скелетини кўтариб келдим”, дейди Житу Мудну журналистларга.

Ушбу воқеа полиция эътиборини тортган. Вазиятни ўрганган ҳуқуқ-тартибот идоралари эркакка пулларни ечиб олишда ёрдам беришга ваъда берган. Шу билан бирга, марҳуманинг суяклари қайта дафн этилишини назорат қилган.

Маҳаллий ҳокимият органлари ҳам ўз навбатида банкка мурожаат қилиб, зарур чораларни кўришни ва эркакка тегишли бўлган 211 долларни тўлаб беришни талаб қилган.