Эрон АҚШ билан навбатдаги музокараларда иштирок этмайди

Теҳрон АҚШ билан музокараларнинг иккинчи босқичида иштирок этишдан воз кечди. Бу ҳақда Эроннинг давлат ахборот агентлиги IRNA хабар берди.

АҚШ ва Эрон ўртасида 8 апрель куни тузилган вақтинчалик сулҳ 21 апрель куни якунига етади. Аввалроқ, АҚШ Президенти Дональд Трамп Америка вакиллари Исломободга йўл олганини ва у ерда Эрон билан янги музокаралар ўтказилишини маълум қилган эди.

Эрон томонининг билдиришича, Теҳрон АҚШ билан музокараларнинг иккинчи босқичида умуман иштирок этишни хоҳламайди ва қатнашмайди ҳам.

Хабарда айтилишича, АҚШнинг ҳаддан ташқари талаблари, нореал ва асоссиз даъволари, позицияларни тез-тез ўзгартириши, доимий зиддиятлари ҳамда Ҳормуз бўғозида давом этаётган денгиз блокадаси музокараларнинг ривожланишига тўсқинлик қилмоқда. Бундай шароитда самарали мулоқот учун имконият йўқ.

Шунингдек, “Tasnim” ҳам Теҳроннинг музокаралардан бош тортганини маълум қилган. Унга кўра, Эрон вакиллари АҚШ Ҳормуз бўғозидаги блокадани сақлаб турган пайтда музокараларнинг иккинчи босқичига қўшилмоқчи эмас.

АҚШ ва Эрон ўртасидаги тўғридан-тўғри музокараларнинг биринчи босқичи 11 апрель куни Покистон воситачилигида ўтказилган, бироқ томонлар муҳим масалалар бўйича келиша олмаган. Эрон янги музокараларга рози бўлишни АҚШ ўз мажбуриятларини бажариши, жумладан Эрон портларига қўйилган блокадани бекор қилиши билан боғламоқда. Теҳрон бу ҳаракатни сулҳ шартларини бузиш деб ҳисоблайди.

АҚШ 13 апрелдан бошлаб Ҳормуз бўғозида блокада ўрнатган. Теҳрон эса бу чорани “муваффақиятсизликка маҳкум” деб атаган. Бунга бошқа давлатлар ҳам қарши чиққан.

Эслатиб ўтамиз, жорий йилнинг 18 апрель куни Эрон АҚШ томонидан давом этаётган денгиз блокадаси сабаб Ҳормуз бўғози яна ёпилганини маълум қилганди. Теҳроннинг таъкидлашича, Эрон илгари эришилган келишувларга амал қилган ҳолда ва ҳалол ёндашув асосида Ҳормуз бўғози орқали чекланган миқдордаги нефть ва савдо кемаларининг назорат остида ўтишига рухсат берган. Бироқ АҚШ яна“хиёнаткорлик” кўрсатиб, блокада ниқоби остида денгиздаги ноқонуний ҳаракатларни давом эттирмоқда.