Эрон АҚШнинг портларни блокада қилиш таҳдидига жавоб қайтарди

Аввалроқ, АҚШ Қуролли кучларининг Марказий қўмондонлиги (CENTCOM) бугун, 13 апрель кунидан бошлаб Эрон портларига кириб-чиқадиган барча кемаларга нисбатан денгиз блокадасини бошлаши ҳақида хабар берилган эди. Теҳрон мазкур ҳаракатларни қароқчилик деб баҳолайди. Бу ҳақда Эрон армиясининг “Хатам-ал-Анбия” штаби матбуот хизмати маълум қилди.

“Агар Форс кўрфази ва Уммон денгизи сувларида Эрон Ислом Республикаси портлари хавфсизлиги таҳдид остида қолса, унда Форс кўрфази ва Уммон денгизидаги бирорта ҳам порт хавфсиз бўлмайди”, дейилади штаб хабарида.

Қайд этилишича, Эрон Қуролли кучлари “Форс кўрфази ва Уммон денгизидаги портлар хавфсизлиги ё ҳамма учун, ёки ҳеч ким учун эмас, дея аниқ ва равшан баён этади”.

Шунингдек, ўз ҳудудий сувларида суверенитетни амалга ошириш “Эрон миллатининг табиий ҳуқуқи” экани билдирилган. Штаб вакилининг сўзларига кўра, АҚШ билан уруш тугаганидан кейин ҳам Теҳрон Ҳормуз бўғози устидан доимий назорат механизмини жорий қилади.

Эслатиб ўтамиз, АҚШ ва Исроил операцияси бошланганидан сўнг, Эрон дунёдаги нефть, конденсат ва нефть маҳсулотларининг 15-20 фоизи, шунингдек, суюлтирилган табиий газ (СТГ) етказиб беришнинг 30 фоиздан ортиғи ўтадиган Ҳормуз бўғози орқали савдо-сотиқни тўхтатишини эълон қилган эди. Жорий йилнинг 11 апрель куни Исломободда АҚШ ва Эрон ўртасидаги музокаралар натижа бермагач, АҚШ Президенти Дональд Трамп Ҳормуз бўғозини блоклашга буйруқ берди. Шунингдек, Трамп Америка кучлари бўғоздан ўтиш учун Эронга пул тўлаган кемаларни қидириши ва ҳибсга олишини қўшимча қилди. Трампнинг сўзларига кўра, Эрон бўғозни миналаш орқали шантаж билан шуғулланмоқда, АҚШ эса ўзини шантаж қилишларига йўл қўймайди.

АҚШ Марказий қўмондонлиги (CENTCOM) маълум қилишича, АҚШ ҳарбийлари 13 апрель куни Шарқий вақт билан соат 10:00 дан бошлаб Эрон портларига кирувчи ва чиқувчи барча денгиз транспорти учун ҳарбий-денгиз блокадасини жорий этади. Эрон Олий раҳнамосининг олий ҳарбий маслаҳатчиси Муҳсин Ризоий бунга жавобан АҚШнинг Ҳормуз бўғозини блоклашга бўлган уринишлари “муваффақиятсизликка маҳкум” эканини айтди. У Теҳрон бундай қадамга йўл қўймаслигини таъкидлади.