Эрон Исроилни бомбардимон қилди (видео)

Кеча, 7 июнь куни Эрон Исроилнинг шимолий ҳудудларига бир неча тўлқинда ракета ҳужумларини амалга оширди. Бу ҳақда BBC хабар берди.

Исроил Мудофаа армиясининг (ЦАҲАЛ) маълум қилишича, Эрон томонидан учирилган барча ракеталар ҳаво ҳужумидан мудофаа тизимлари томонидан йўқ қилинган.

“Ҳаво ҳужумидан мудофаа тизими ҳозирда таҳдидларни аниқлаш ва уларни бартараф этиш устида ишламоқда”, дейилади ЦАҲАЛ баёнотида.

Эрон Ислом инқилоби қўриқчилари корпуси эса Исроил янада кучли зарбаларга дуч келишини маълум қилди.

“Бу операция бир марталик ҳаракат эмас, балки узлуксиз давом этадиган бир ҳафталик ҳужумлар бошланишидир. Кейинги етти кун давомида душман тўхтатилмагунча ва ўз ҳаракатларини якунламагунча ракета ва дронлар тўлқини кеча-кундуз давом этади”, дейилади корпус баёнотида.

Эрон расмийлари Исроил Байрут жанубидаги нишонларга зарба бериш орқали “барча қизил чизиқлардан ўтганини” таъкидлаган. Аввалроқ, Исроил Ливан пойтахти жанубида жойлашган “Ҳизбуллоҳ” объектларига зарба берганини маълум қилган эди.

Ракета ҳужумларидан сўнг Исроил армияси Бош штаби раҳбарияти душманга қарши қатъий жавоб қайтарилишини билдирган. Армия вакиллари Эрон “жиддий хато қилганини” таъкидлаган.

Айни пайтда АҚШ Президенти Дональд Трамп “Axios” нашрига берган интервьюсида Исроил Бош вазири Биньямин Нетаньяҳудан жавоб ҳужумларини тўхтатишни сўраш нияти борлигини айтган. Унинг фикрича, бу эҳтимолий АҚШ–Эрон келишувини сақлаб қолиш учун муҳим ҳисобланади.

Кейинроқ “Financial Times” билан телефон орқали суҳбатда Трамп Нетаньяҳу АҚШ Эрон билан эришадиган ҳар қандай келишувни қабул қилишдан бошқа чораси йўқлигини айтган.

“Унинг бошқа танлови бўлмайди. Қарорларни мен қабул қиламан. Барча қарорларни мен қабул қиламан. Нетаньяҳу қарор қабул қилмайди”, деган Трамп.

Унинг таъкидлашича, Эроннинг сўнгги ҳужумлари эҳтимолий келишувга ҳеч қандай таъсир кўрсатмаган.
“Fox News” маълумотига кўра, Трамп Эронга ҳам мурожаат қилиб, “Етарли. Музокаралар столига қайтинг”, деган. Шунингдек, у Исроилнинг Байрутга берган зарбаларидан норозилигини ҳам билдирган.

Кейинроқ Исроил Мудофаа армияси Эроннинг ракета ҳужумларидан сўнг жавоб зарбасини амалга оширганини маълум қилди.

“Бироз аввал Исроил ҳарбий-ҳаво кучлари Эроннинг ғарбий ва марказий ҳудудларида жойлашган ҳарбий нишонларга зарба берди”, дейилади ЦАҲАЛ баёнотида.

Армия вакиллари операция тафсилотлари кейинроқ маълум қилиниши айтган.

Эслатиб ўтамиз, аввалроқ АҚШ Президенти Дональд Трамп журналистлар билан ўтган матбуот анжуманида АҚШ яқин орада Эрон билан урушни якунлашини маълум қилганди.