Эрон Жаҳон чемпионатини тўхтатиш билан таҳдид қилди

Эрон миллий терма жамоаси 2026 йилги Жаҳон чемпионатида ўз жамоасига қарши қаратилган рухсатсиз байроқлар ёки шиорлар пайдо бўлган тақдирда ўйинни давом эттиришдан бош тортиши мумкин. Бу ҳақда “Jerusalem Post” нашри хабар берди. 

Маълум қилинишича, Эрон спорт вазири Аҳмад Дунямолий бу борада FIFA’га расмий огоҳлантириш юборилганини билдирган.

“Биз FIFA’га Эрон иштирокидаги Жаҳон чемпионати ўйинларида норасмий байроқлар кўтарилса ёки миллий терма жамоага қарши шиорлар янграса, жамоа вакиллари ўйинни тўхтатишни талаб қилиши мумкинлигини маълум қилдик”, дейди Дунямолий.

Унинг таъкидлашича, FIFA Эрон томонига Мисрга қарши учрашув вақтида бундай ҳолатлар юз бермаслиги бўйича кафолат берган.

Аввалроқ Эрон ва Миср футбол федерациялари FIFA’га мурожаат қилиб, Сиэтл шаҳрида бўлиб ўтадиган ўзаро учрашув давомида Pride ҳаракати билан боғлиқ тадбирларнинг стадион атрофида ўтказилишининг олдини олишни сўраган эди. Учрашув Pride Week ҳафталиги даврига тўғри келади.

Шунингдек, жорий йилнинг апрель ойида Канаданинг Ванкувер шаҳрида ўтган FIFA конгресси олдида Эроннинг Жаҳон чемпионатида иштирок этишига қарши норозилик намойишлари бўлиб ўтган ва намойишчилар жамоани мусобақадан четлатишни талаб қилган эди.

Маълумот учун, Эрон терма жамоаси 2026 йилги Жаҳон чемпионатида “Г” гуруҳидан ўрин олган. Жамоа мусобақадаги иштирокини 15 июнь куни Лос-Анжелесда Янги Зеландияга қарши баҳс билан бошлайди. Кейинчалик, 21 июнь куни Бельгияга қарши, 26 июнь куни эса Сиэтл шаҳрида Мисрга қарши майдонга тушади.