Эронда намойишчилар 30 дан ортиқ масжидни ёқиб юборди (видео)

north_east

“Трамп ағдарилади”. Хоманаий халққа мурожаат қилди (видео)

Жорий йил январь ойида Эрон бўйлаб кенг тарқалган ҳукуматга қарши норозиликлар кескин босқичга ўтиб, намойишчилар мамлакатдаги 30 дан ортиқ масжидга ўт қўйди. Бу ҳақда MM News нашри хабар берди.  

Қайд этилишича, Теҳрон мэри Алиризо Зокани бугун, 10 январь куни тартибсизликлар давомида 30 дан зиёд масжид ёқиб юборилганини маълум қилган. Интернетда тарқалган ва тасдиқланган видеоларда кеча, 9 январь куни Теҳрондаги Ал-Расул масжиди аланга ичида қолганини кўриш мумкин. Шунингдек, Теҳрон шимолидаги Голҳак ва Саодатобод маҳаллаларидаги масжидларда ҳам ёнғинлар қайд этилгани хабар қилинмоқда. 

Эроннинг жануби-шарқида жойлашган Зоҳидон шаҳридаги Макки масжиди яқинида бўлиб ўтган намойишлар зўравонлик билан кечган. Хабарларга кўра, намойишчилар билан хавфсизлик кучлари ўртасида тўқнашувлар юз берган. Масжид атрофида одамлар тўпланган пайтда хавфсизлик ходимлари ўқ узган. 

Намойишлар дастлаб Эрон миллий валютасининг кескин қадрсизланиши, инфляциянинг ошиши ва ҳаёт нархларининг қимматлашуви туфайли бошланган. Бироқ вақт ўтиши билан норозиликлар тобора сиёсий тус ола бошлаган.

BBC Persian’нинг инсон ҳуқуқлари ташкилотларига таяниб хабар беришича, норозилик мамлакатнинг 31 вилоятидаги 100 дан ортиқ шаҳар ва аҳоли пунктларида тартибсизликларга сабаб бўлган. 

Намойишчилар “Диктаторга ўлим” ва “Хоманаийга ўлим” каби шиорларни айтиб, мамлакатни бошқараётган тизимга очиқ қарши чиқмоқда.

Вазият ортидан Эрон расмийлари кескин огоҳлантиришлар билан чиқди. Олий суд раҳбари Ғуломҳусайн Моҳсени Эжеий ўзи “саботажчилар” деб атаган шахсларга нисбатан қатъий жазолар қўлланишини ваъда қилди. Ҳукумат қурбонлар бўйича расмий рақамларни эълон қилмаган. Бироқ “Human Rights Activists News Agency” ўз ҳисоботида камида 38 киши ҳалок бўлганини, жумладан хавфсизлик кучларининг 4 нафар ходими борлигини маълум қилган. Шунингдек, ўнлаб одамлар жароҳат олгани ва 2 217 киши ҳибсга олингани айтилган. 

“Tasnim” ахборот агентлиги намойишлар давомида 568 нафар полиция ходими жароҳатлангани, шунингдек, Басиж ҳарбийлаштирилган кучларининг 66 аъзоси ҳам тан жароҳати олганини хабар қилган.

Эслатиб ўтамиз, аввалроқ тартибсизликларни жиловлаш ва ахборот тарқалишини чеклаш мақсадида мамлакат бўйлаб интернет ўчириб қўйилганди.