Эронда Нобель мукофоти соҳибаси 7,5 йилга қамалди

Эронлик инсон ҳуқуқлари ҳимоячиси ва 2023 йилги Нобель тинчлик мукофоти лауреати Наргиз Муҳаммадий 7,5 йилга озодликдан маҳрум этилди. Бу ҳақда кеча, 8 февраль куни унинг адвокати Мустафо Нили хабар берди.

53 ёшли фаол аёл “жиноят содир этиш мақсадида йиғилишларда қатнашиш ва фитна уюштириш” айблови билан 6 йил, шунингдек, “тарғибот олиб бориш” учун 1,5 йил қамоқ жазосига ҳукм қилинган. Бундан ташқари, у озодликка чиққанидан сўнг икки йил давомида мамлакатдан чиқиб кетиш ҳуқуқидан маҳрум этилади.

Муҳаммадий 2025 йил 12 декабрда инсон ҳуқуқлари бўйича адвокат Хосров Аликордий хотирасига бағишланган маросим чоғида ҳибсга олинган. 2 февраль куни у очлик акциясини эълон қилган. Адвокатининг сўзларига кўра, ҳукм чиқарилишидан бир неча кун олдин соғлиғи ёмонлашгани сабабли у касалхонага олиб кетилган, бироқ кейинчалик яна қамоққа қайтарилган. Нили унинг соғлиғи ҳолатини инобатга олган ҳолда даволаниш учун вақтинча гаров эвазига озод этилишига умид билдирмоқда.

Наргиз Муҳаммадий Эрон Инсон ҳуқуқлари ҳимоячилари маркази вице-президенти ҳисобланади. Сўнгги 20 йил давомида у инсон ҳуқуқларини ҳимоя қилиш фаолияти, журналистик ишлари ва амалдаги ҳокимиятга қарши чиқишлари сабабли Эрон ҳукумати томонидан бир неча бор ҳибсга олинган. Умуман олганда, у 13 марта қўлга олинган.

Янги ҳукмни ҳисобга олмаганда, унга илгари тайинланган умумий қамоқ муддати 31 йилни ташкил этган бўлиб, шундан тахминан 10 йилини у аллақачон ўтаб бўлган. 2021 йилда эса “давлатга қарши тарғибот” айби билан 2,5 йил қамоқ ва 80 дарра жазоси белгиланган. 2024 йилнинг декабрида у соғлиғи сабабли вақтинча озодликка чиқарилган эди.

Фаол аёл тарафдорларининг таъкидлашича, қамоқда бўлган йиллари давомида у бир неча бор юрак хуружини бошдан кечирган, 2022 йилда эса унга шошилинч жарроҳлик амалиёти ўтказилган. 2024 йил охирида унинг суяк тўқимасида ўсма аниқланиб, кейинчалик у олиб ташланган.