Фаластинлик собиқ футболчи Исроил ҳужуми оқибатида ҳалок бўлди (видео)

north_east

Ғазога очарчилик яқинлашмоқда (фоторепортаж)

Кеча, 6 август куни Фаластин терма жамоасининг собиқ футболчиси Сулаймон ал-Обайд Исроил ҳужуми оқибатида 41 ёшида ҳалок бўлди. Бу ҳақда Фаластин Футбол Ассоциацияси (ФФА) матбуот хизмати хабар берди.

ФФА хабарига кўра, Исроил ҳужум пайтида ал-Обайд Ғазо секторининг жанубида инсонпарварлик ёрдамини кутаётган одамлар орасида бўлган. У 2023 йил октябрдан бери ҳалок бўлган Фаластин футболининг 321-вакилига айланди. Сулаймоннинг рафиқаси, икки нафар ўғли ва уч нафар қизи бор.

Сулаймон ал-Обайд 41 ёшда бўлган. У футболчилик фаолияти давомида Фаластин чемпионатида, жумладан, Ғазо клубларида тўп сурган. Фаластин терма жамоаси сафида 19 та ўйин ўтказиб, 2 та гол урган.

Собиқ футболчининг ўлимига машҳур франциялик афсона Эрик Кантона ҳам муносабат билдириб, Ғазодаги геноцидни кескин қоралаган.

“Исроил ҳозиргина Рафаҳда ёрдам кутиб турган пайтда Фаластин миллий терма жамоаси юлдузи Сулаймон ал-Обайдни ўлдирди. У “Фаластин Пелеси” дея аталарди. Яна қанча вақт бу геноцидга йўл қўямиз??? Фаластинга озодлик!” дея ёзган у ўзининг Instagram саҳифасида.

Маълумот учун, 2023 йил 7 октябрдан бери Исроилнинг Ғазо секторидаги уруши оқибатида камида 61 258 киши ҳалок бўлган, 152 045 киши яраланган.

Эслатиб ўтамиз, аввалроқ Ғазо секторида озиқ-овқат юкларини олиб кетаётган гуманитар юк машинасининг ағдарилиб кетиши оқибатида 20 нафар фаластинлик ҳалок бўлганди. Ҳодиса давом этаётган гуманитар блокада вақтида юз берган. Ғазо маъмуриятининг таъкидлашича, Исроил “оммавий очарчилик жиноятини содир этиш” орқали 2,1 миллион кишининг ҳаётини хавф остига қўйган ва озиқ-овқат, дори-дармон ва зарурий буюмлар етказиб беришга тўсқинлик қилишда давом этмоқда.