“Фенербахче” Моуриньюни истеъфога чиқарди

Туркиянинг “Фенербахче” клуби португалиялик бош мураббийси Жозе Моуриньюни истеъфога чиқарди.  Бу ҳақда клуб матбуот хизмати хабар берди. 

Манбага кўра, Моуриньюнинг истеъфосига жамоанинг Чемпионлар лигасидан саралашидаги мағлубият сабаб бўлган.

“2024/25 йилги мавсумдан буён профессионал футбол жамоамизни бошқариб келаётган Жозе Моуринью билан хайрлашдик. Унга клубимиз ривожига қўшган ҳиссаси учун миннатдорлик билдирамиз ва келгусидаги фаолиятида омад тилаймиз”, дейилади “Фенербахче ” клубининг расмий баёнотида.

Моуриньюнинг жамоаси Чемпионлар лигаси саралаш босқичининг ҳал қилувчи баҳсида Лиссабоннинг “Бенфика” клубига умумий ҳисобда мағлуб бўлиб, асосий босқичга чиқа олмади. Шундан сўнг жамоа  раҳбарияти Моуриньюга энди ишонч билдирмасликка қарор қилди ва шартномани бекор қилди. Жозе Моуринью 2024 йилдан бери “Фенербахче”ни бошқариб келаётган эди. Ўтган мавсумда унинг жамоаси Туркия Суперлигасида иккинчи ўринни эгаллаган.

Маълумот учун, Моуринью мураббийлик фаолияти давомида “Порту”, “Челси”, “Интер” ва “Реал Мадрид”да катта ютуқларга эришган. Бироқ унинг “Манчестер Юнайтед”, “Тоттенхэм” ва “Рома”даги фаолияти кўпроқ муваффақиятсизликлар билан эсда қолган.

Эслатиб ўтамиз, Туркиянинг бошқа бир клуби – “Истанбул Башакшеҳир” ҳам Конференциялар лигаси саралаш босқичидан ўта олмади.