FIFA Россия жамоаларига қўйилган тақиқни бекор қилиши мумкин

Халқаро футбол федерацияси (FIFA) президенти Жанни Инфантино ташкилот Россия жамоаларига қўйилган тақиқни олиб ташлаш масаласини кўриб чиқишга мажбур эканини ва бу тақиқнинг фойдасизлигини айтди. Бу ҳақда у “Sky News”га берган интервьюсида маълум қилди.

2022 йил февралида FIFA ва Европа футбол ассоциациялари иттифоқи (UEFA) Украинадаги воқеалар сабабли Россия терма жамоалари ва клубларини халқаро мусобақаларда иштирок этишдан номаълум муддатга четлатганди.

Инфантино “FIFA Россия жамоаларининг иштирокини тақиқлашни бекор қилиш имкониятини кўриб чиқадими?” деган саволга жавоб берган.

“Биз буни қилишга мажбурмиз, албатта. Чунки бу тақиқ ҳеч қандай натижа бермади, фақат кўпроқ ҳафсала пир бўлиши ва нафратни келтириб чиқарди”, дейди у.

Шунингдек, FIFA раҳбари Россиядаги қизлар ва ўғил болаларнинг Европанинг бошқа ҳудудларида футбол ўйнаш имкониятига эга бўлиши фойдали бўлишига ишонч билдирган.

Маълумот учун, UEFA ижроия қўмитаси 2023 йил 26 сентабрда 17 ёшгача бўлган россиялик футболчилардан иборат терма жамоаларга халқаро турнирларда иштирок этишга рухсат берган. Режага кўра, аёллар ва эркаклар жамоалари ўз ўйинларини байроқ ва мадҳиясиз, шунингдек Россия ҳудудидан ташқарида ўтказиши керак. Бироқ 2025 йил 10 октябрь куни UEFA вакиллари РИА Новостига бу масала кун тартибидан олиб ташланганини, чунки “Россия жамоаларининг ўйнаши учун техник ечим топиб бўлмаганини” маълум қилган. Ташкилот раҳбари Александер Чеферин ОАВга россиялик ўсмирлар жамоаларини мусобақаларга қўшишнинг имкони бўлмаганини, бунга “айрим ассоциациялар ўз ҳукуматларининг кучли таъсири остида экани” сабаб бўлганини айтган.