Флик “Барселона” билан шартномани узайтиради – ОАВ

“Барселона” бош мураббийи Ханс-Дитер Флик Каталония клуби билан шартномасини 2028 йилгача узайтиради. Бу ҳақда “Sport” нашри хабар берди.

Манбага кўра, германиялик мутахассис янги шартнома имзолашга рози бўлган. Бироқ, расмий эълон “Барселона” президентлик сайловлари натижалари эълон қилинмагунча кечиктирилади. Бу қарор Жоан Лапортанинг сайловдаги ғалабасини мустаҳкамлаш мақсадида қабул қилингани айтилмоқда.

Қайд этилишича, Флик клубдаги фаолиятидан мамнун ва айниқса ёш футболчиларни ривожлантиришга катта эътибор қаратилаётганини юқори баҳоламоқда. Мураббийнинг асосий мақсади – ўзи шакллантирмоқчи бўлган авлод билан Чемпионлар лигасида ғалаба қозонишдир.

Маълумот учун, Испания чемпионатининг 28-туридан сўнг “Барселона” 70 очко тўплаб, турнир жадвалида “Реал”дан тўрт очко олдинда бормоқда ва пешқадамлик қилмоқда.

Эслатиб ўтамиз, кеча, 15 март куни “Барселона” клуби президентлик сайловида Жоан Лапорта яна “Барселона” президенти этиб сайланди.