Гаттузо ўз мухлисларини кескин танқид қилди

Италия терма жамоаси бош мураббийи Женнаро Гаттузо кеча, 13 ноябрь куни Молдовага қарши Жаҳон чемпионати саралаш босқичидаги ўйинда 0:2 ҳисобида қўлга киритилган ғалабадан кейин ўз мухлисларини кескин танқид қилди. Бу ҳақда “bein sports” нашри хабар берди.

“Бу Италиядаги энг яхши ўйин бўлмаган деб айтяпсизми? Мен йигитларнинг ўйинни бошқараётганини кўрдим. Молдова дарвозага бирорта аниқ зарба бера олмади.

Агар кимдир Норвегияга қарши 11:1 бўлади деб ўйлаган бўлса, бу менинг муаммом эмас. Осон ўйин бўлмайди. Бугун оломондан эшитган танқидлар мени хафа қилди. Айнан шундай пайтда биз бирдам бўлишимиз керак”, дейди Гаттузо.

Шунингдек, Гатуззо баъзи мухлисларнинг футболчиларга нисбатан қўполлик қилганини қаттиқ қоралади:

“Уйдан узоқда ўйнаймиз, аммо 500 га яқин мухлиснинг ўз футболчиларини ҳақорат қилаётганини эшитдик. Мен буни қабул қилмайман”, дея қўшимча қилди мураббий.

Италия терма жамоаси ушбу баҳсда Жанлука Манчини ва Франческо Пио Эспоситонинг сўнгги дақиқалардаги голлари эвазига ғалаба қозонди. Ушбу натижа билан Италия саралашнинг “И” гуруҳида иккинчи ўринни сақлаб қолди, бироқ Женнаро Гаттузо  шогирдлари жорий йилнинг 16 ноябрь куни пешқадам Норвегия билан баҳсда камида тўққизта тўп фарқи билан мағлуб этсагина 2026 йилги Жаҳон чемпионатига автоматик йўлланма олиши мумкин.

Агар Италия Норвегияни йирик ҳисобда мағлуб эта олмаса, келаси йил март ойида UEFA плей-офф босқичида иштирок этади. Плей-оффда 16 та жамоа тўртта йўналишга бўлинган ҳолда финал босқичига чиқиш учун курашади.

Эслатиб ўтамиз, аввалроқ “Ливерпуль” жамоаси ярим ҳимоячиси Федерико Кьеза Италия терма жамоасининг чақирувини рад этган эди.