Ғазога киришга уринган Грета Тунбергни Исроил депортация қилди

Швециялик экофаол Грета Тунберг Исроилдан депортация қилинди. Бу ҳақда бугун, 10 июнь куни эрталаб Исроил Ташқи ишлар вазирлиги ўзининг Х ижтимоий тармоқдаги саҳифасида хабар берди.

Вазирлик Тунбергнинг Францияга учаётган самолёт бортида акс этган видеосини эълон қилди. Франциядан фаол Швецияга бориши кераклиги ёзилган.

Тунберг яна 11 нафар фаол билан бирга “Мадлин” яхтасида Ғазо сектори қирғоқларига яқинлашмоқчи бўлди. Кема Исроил ҳарбийлари томонидан қўлга олинган. Исроил ТИВ Ғазо қирғоқлари яқинидаги денгиз зонаси “халқаро қонунларга мувофиқ қонуний денгиз блокадасига мувофиқ” ёпилганини эслатди.

Грета Тунберг 2018 йилда Швеция парламентининг ташқарисида ҳукуматдан иқлим бўйича келишувларни бажаришни талаб қилиб, иш ташлашлар ўтказа бошлаганидан сўнг кенг шуҳрат қозонди. Бундай норозилик намойишлари дунёнинг бошқа мамлакатларида ҳам ўтказила бошланди. 2019 йилда Тунберг БМТнинг иқлим саммитида нутқ сўзлади ва “Time” журнали уни “Йил одами” деб эълон қилди. Ўшандан бери Тунберг тўрт марта тинчлик бўйича Нобель мукофотига номзод бўлган.

Тунберг аввалроқ принципиал равишда учишдан бош тортган эди. Хусусан, у Европадан Нью-Йоркдаги БМТ иқлим саммитига елканли яхтада Атлантика океани орқали етиб борганди.

У 2023 йилда Финландиянинг собиқ президенти Саули Ниинистё ва дунёнинг бошқа 28 арбоби билан бир қаторда Хельсинки университетида фахрий доктор унвонига сазовор бўлганди.