“Геймер Президент”. Трампнинг Minecraft’даги персонажи эълон қилинди

Оқ уй АҚШ Президенти Дональд Трампнинг Minecraft ўйинидаги қаҳрамон кўринишида тасвирланган фотосуратини эълон қилди. Ушбу расм Оқ уйнинг Х ижтимоий тармоғидаги саҳифасида жойланди.

Постга “Американинг энг про-геймер Президенти!” деган ёзув ҳам қўшилган. Ушбу сурат ва изоҳ АҚШда рақамли технологиялар соҳасида ишлаб чиқиш ва тадқиқотлар учун берилган солиқ имтиёзлари мамлакатда видеоўйинлар ишлаб чиқариш ҳажмини оширгани ҳақидаги постга жавобан жойланган.

Маълумот учун, Minecraft – куб шаклидаги блоклардан ташкил топган, процессуал тарзда яратилган дунёларни ўрганиш ва ўзлаштиришга асосланган “sandbox” жанридаги компьютер ўйини. Унда ўйинчилар қуриш, изланиш, жанг қилиш, омон қолиш ва ўз ғояларини рўёбга чиқаришлари мумкин. Шу боис бу лойиҳа таълим соҳасида ҳам қўлланади.

Эслатиб ўтамиз, аввалроқ АҚШ Хитой армиясига сунъий интеллект чиплари ёрдам беришидан хавотирда бўлишига қарамай, Дональд Трамп Nvidia H200 чипларини ниҳоят Хитойга сотишга рози бўлганди.