Испания Бош вазирини олиб кетаётган самолёт фавқулодда Анқарага қўнди

Кеча, 3 май куни Испания Бош вазири Педро Санчезни олиб кетаётган самолёт Мадриддан Арманистон пойтахти Ереванга учаётган пайтда техник носозлик сабаб Анқарага фавқулодда қўнди. Бу ҳақда Испаниянинг расмий EFE ахборот агентлиги хабар берди.

Қайд этилишича, Европа сиёсий ҳамжамияти саммити йиғилишида иштирок этиш учун кетаётган Санчезнинг расмий Airbus A310 самолёти техник носозлик юзага келгани сабаб Анқарага қўнишга мажбур бўлган.

Носозлик жиддий эмас деб баҳоланган, бироқ хавфсизлик протоколларига амал қилинган. Санчез Анқарада тунаб қолган ва бугун, 4 май куни эрталаб Ереванга йўлини давом эттирган.

Бундан аввал ҳам Санчез худди шундай ҳолатни бошдан ўтказган. 2025 йил 4 сентябрь куни у Парижда Украинага бағишланган йиғилишни самолёт носозлиги сабаб ўтказиб юборган эди.

Ўша пайтда у учаётган самолёт техник муаммо сабаб парвоз ўртасида Мадридга қайтган ва Санчез йиғилишда масофадан туриб иштирок этган.

Эслатиб ўтамиз, аввалроқ Австралия Бош вазири Энтони Альбанезе учаётган самолёт экипаж аъзоларидан бирининг тоби қочгани сабабли АҚШга фавқулодда қўнганди.