Испанияда поезднинг устига девор қулаб тушди. Қурбон бор (видео)

Испаниянинг Каталония минтақасида кучли бўрон туфайли темирйўл четидаги девор ҳаракатланиб кетаётган поезд устига қулаб тушди. Ҳодиса оқибатида стажёр машинист ҳалок бўлди, 40 га яқин йўловчи турли даражада жароҳат олди. Бу ҳақда АВС хабар берди.

Маълумотларга кўра, фожиа кеча, 20 январь куни кечқурун Барселонадан тахминан 40 километр ғарбда жойлашган Гелида шаҳри яқинида содир бўлган. Каталония ёнғин хизмати вакили Клауди Галлардонинг сўзларига кўра, поезд ҳаракатланаётган пайтда таянч девор рельслар устига қулаб тушган. Оқибатда бир киши – поезд машинисти ҳалок бўлган, яна беш нафар йўловчи оғир жароҳат олган.

Фавқулодда хизматлар ахборотига кўра, жами 37 кишига тиббий ёрдам кўрсатилган, уларнинг аксарияти енгил жароҳатлар олган. Бир нафар йўловчини эса шикастланган вагон ичидан чиқариб олишга тўғри келган. Жароҳатланганларнинг кўпи девор қулаган биринчи вагонда бўлган.

Ҳозирда ҳодиса сабабли ҳудудда темирйўл қатнови вақтинча тўхтатилган.

Эслатиб ўтамиз, аввалроқ Испанияда тезюрар поездлар тўқнашиб кетгани ҳақида хабар берилганди.