Исроил Суриядаги друзларни “ҳимоя қилмоқчи”

Исроил армияси Суриянинг жанубида жойлашган друзлар яшайдиган аҳоли пунктларини “ҳимоя қилишга” тайёрлигини билдирди. Бу ҳақда Исроил армиясининг Telegram-каналида эълон қилинди.

“Тунда 5 нафар суриялик друз тиббий ёрдам олиш учун Исроилга эвакуация қилинди. Жароҳат олган фуқаролар Сурия ҳудудида яраланганидан сўнг Сафед шаҳридаги Зив тиббиёт марказига етказилди. Исроил армияси Сурия жанубида жойлаштирилган бўлиб, друз қишлоқлари ҳудудига душман кучларининг кириб келишини олдини олишга тайёр ҳолатда. Армия воқеаларнинг ривожини кузатишда давом этмоқда ва мудофаа ҳамда турли сценарийларга тайёр турибди”, дейилади баёнотда.

30 апрель куни қуролли гуруҳлар Дамашқ чеккасидаги друзлар яшовчи Саҳная шаҳрига бостириб кирган. Кун бўйи улар қўшимча кучларни, шу жумладан зирҳли транспорт воситаларини олиб келди ва друзларнинг қўшимча кучларининг яқинлашиш эҳтимолини йўқ қилди.

Исроил авиацияси “маҳаллий аҳолини ҳимоя қилиш” баҳонаси билан бир неча бор ҳаво ҳужумларини амалга оширди. Сурия Ташқи ишлар вазирлиги эса давлатнинг ички ишларига аралашувни қоралади.

1 май куни Суриядаги друзлар маънавий етакчиси Ҳикмат ал-Хижр халқаро кучларни друзлар жамоасини жангариларнинг ҳужумларидан ҳимоя қилиш учун зудлик билан киритишга чақирди. Бу мурожаатга сабаб этник-диний гуруҳ вакиллари кўп яшайдиган Сахна шаҳрида юз берган тўқнашувлар бўлди.

2 май куни Исроил Бош вазири Биньямин Нетаньяху ва Мудофаа вазири Исроил Кац Дамашқдаги президент саройи яқинидаги нишонга берилган зарба бўйича қўшма баёнот билан чиқди. Ҳужум “Сурия режимига йўлланган аниқ сигнал” сифатида баҳоланди.

Худди шу куни Суриянинг муваққат президенти Аҳмад аш-Шара Дамашқдаги президент саройи ҳудудига уюштирилган авиазарбаларни хавфли кескинлашув деб атади.

Маълумот учун, друзлар ўзига хос араб тилида сўзлашувчи этно-конфессиявий гуруҳ бўлиб, уларнинг вакиллари Сурия, Ливан, Исроил ва Иорданияда яшайди. Сурияда 700 минг друз истиқомат қилади, бу уларни курдлар ва алавийлардан кейин мамлакатдаги учинчи йирик диний ва этник озчилик қилади.

Эслатиб ўтамиз, аввалроқ Исроил авиацияси Суриянинг Латакия вилоятидаги ҳарбий нишонларга зарба бергани хабар қилинганди. Бир неча соат ичида Исроил Араб Республикасининг бир қанча провинцияларидаги нишонларга 18 марта ҳаво ҳужумини амалга оширган. Зарбалар Суриянинг марказий Ҳама вилоятидаги Дамашқ чеккаси ва жанубдаги Дара вилоятидаги нишонларга берилган.