Қидирувдаги ўзбекистонлик аёл Туркияда ушланди 

6 йилдан буён қидирувда бўлган ўзбекистонлик аёл Туркияда қўлга олиниб, Ўзбекистонга қайтарилди. Бу ҳақда Ички ишлар вазирлиги хабар берди.

Қайд этилишича, ИИВ ТҚД ҳамда Туркия Республикаси ИИВ билан ҳамкорликда олиб борилган тезкор-қидирув ишлари натижасида муқаддам Жиноят кодексининг 168-моддаси (фирибгарлик) 3-қисмида кўрсатилган жиноятни содир этган аёл қўлга олинган. У ўзи ташкил этган МЧЖга фуқароларни хорижий давлатларга ишга юбориш бўйича тегишли лицензияга эга бўлмасдан, уларни АҚШ ва Европа давлатларига яхши иш ҳақи тўланадиган ишларга ишлаш учун юборишини айтиб алдаб келган. Содир этаётган фирибгарлик жиноятини яшириб, фуқароларга турли хилдаги хизматларни кўрсатиш тўғрисида шартномалар тузиш орқали уларнинг ишончига кириб, катта миқдордаги пулларни алдов йўли билан қўлга киритган ва ўзининг шахсий эҳтиёжларига ишлатиб юборган. 

Билдирилишича, 2020 йилдан буён қидирувда бўлган аёл Туркияда яшириниб юргани аниқланган ва қўлга олиниб, Ўзбекистонга қайтарилган.

Эслатиб ўтамиз, аввалроқ Ўзбекистонда гиёҳванд моддалари савдоси билан шуғулланиб, ҳуқуқ-тартибот органларидан яшириниш учун чет элда қочиб юрган қидирувдаги 37 ёшли шахс АҚШда қўлга олинган эди.