Қозоғистон тарихидаги энг йирик кокаин партияси мусодара қилинди (видео)

Қозоғистон Миллий хавфсизлик қўмитаси (МХҚ) халқаро кокаин контрабандаси каналини фош этиб, 13 тонна 183 килограмм наркотикни мусодара қилди. Бу ҳақда идора матбуот хизматига таяниб, “Tengrinews.kz” хабар берди.

Қайд этилишича, республика тарихида бир мартада қўлга олинган энг йирик наркотик моддаси – 13 тонна 183 килограмм кокаин Олмаотада мусодара қилинган. Юк Қозоғистон орқали учинчи мамлакатларга транзит қилиниши керак бўлган.

“Таққослаш учун, 13 тонна 183 килограмм кокаин – бу тўққизта Toyota Camry автомобили оғирлигига тенг. Агар уни Toyota Camry багажларига жойлаштирилса, бутун партияни олиб чиқиб кетиш учун 25 дан ортиқ машина керак бўларди”, дейилади хабарда.

Нашрнинг ёзишича, МХҚ ушбу катта партиянинг тахминий нархини очиқламаган. Аммо таққослаш учун мисол келтирилган: жорий йилнинг март ойида ИИВ 600 грамм кокаинни 100 миллион тенге деб баҳолаган. Шу асосда Олмаотада қўлга олинган партиянинг тахминий қиймати 2 триллион 197 миллиард 167 миллион тенгедан ошиши мумкин.

Наркоканални ташкил этишда гумон қилиниб, икки нафар чет эллик ушланган ва қамоққа олинган. Жиноят кодексининг 297-моддаси 3-қисми бўйича дастлабки тергов ҳаракатлари олиб борилмоқда.

Эслатиб ўтамиз, аввалроқ Андижон вилоятининг Қўрғонтепа туманида Қирғизистондан наркотик моддалар олиб келиб, сотиш билан шуғулланган жиноий гуруҳ аъзолари қўлга олинганди.