Қозоғистонда қизамиқ аниқланган болалар мактаб ва боғчалардан четлаштирилади

19 февралдан Қозоғистонда қизамиқ билан касалланиш ҳолатлари қайд этилса, инфекция тарқалишининг олдини олиш учун эмланмаган болалар вақтинча боғча ва мактаблардан четлаштирилади. Бу ҳақда “Central Asia” хабар берди.

Маълум бўлишича, тегишли фармон мамлакатнинг бош давлат санитария шифокори Сархат Бейсенова томонидан имзоланган ва 19 февралдан кучга кирган.

Фармонга кўра, таълим бошқармалари раҳбарлари болалар ўртасида эмлаш қамровини камида 90 фоиз даражасида кузатиб боришлари, касаллик белгилари бўлган болалар ва ўқитувчиларнинг таълим муассасаларига киришига йўл қўймаслик учун "эрталабки фильтр" ўтказишлари ва ота-оналарни эмлаш зарурати ҳақида хабардор қилишлари шарт бўлади.

Бундан ташқари, таълим муассасаларига қизамиқ билан касалланиш ҳолатлари аниқланган тақдирда эмланмаган болаларни вақтинча олиб кетишни таъминлаш бўйича кўрсатма берилган.

Санитария-эпидемиология назорати қўмитаси илгари мамлакатда кенг тарқалган эмлаш рад этилиши пода иммунитетининг пасайишига олиб келганини хабар қилган. 

Агентлик маълумотларига кўра, қизамиқ билан касалланган болаларнинг 59 фоизи ота-оналарининг рад этиши туфайли эмланмаган.

Эслатиб ўтамиз, аввалроқ Жаҳон соғлиқни сақлаш ташкилоти (ЖССТ) сўнгги бир неча йил ичида касалланиш ҳолатларининг кўпайгани сабабли Ўзбекистонни қизамиқдан холи мамлакат мақомидан маҳрум қилгани ҳақида хабар берилганди.