Қозоғистонда парламент “Қурултой” деб қайта номланади

Қозоғистон парламенти “Қурултой” деб қайта номланиши мумкин. Бундай номни бугун, 20 январь куни Қозоғистон Президенти Қосим-Жомарт Тўқаев Қизилўрдада бўлиб ўтган Миллий қурултойнинг V йиғилишидаги чиқиши чоғида қўллаб-қувватлаган.

“Биласизлар, мен бир палатали парламентни ташкил этиш ташаббусини илгари сурганман. Бу ниҳоятда муҳим масала бўлиб, жамиятда кенг муҳокама қилинди. Асосий баҳслар янги парламент қандай бўлиши, унда нечта депутат бўлиши, унинг тузилмаси ва қандай ишлаши масалалари атрофида кечди.

Айтишим мумкинки, бу жуда муҳим, ҳатто ҳал қилувчи масала бўлиб, у чуқур ўрганишни, ҳар томонлама таҳлилни, пухта ўйлаб кўришни ва жиддий якуний қарор қабул қилишни талаб этди. Энди мен ишчи гуруҳда муҳокама қилинган асосий таклифларни сизларга тақдим этмоқчиман.

Энг аввало, келажакдаги парламент номи борасидаги фикримни айтмоқчиман. Қисқача қилиб айтганда, мен уни “Қурултой” деб аташ керак, деб ҳисоблайман”, дейди Қозоғистон Президенти.

Тўқаев “Қурултой”нинг тарихий кўлами ва аҳамияти халқ учун тушунарли ва яқин эканини қайд этган.

“Мен ўзим 2022 йилда Қурултойни қайта тиклаш ташаббусини илгари сурганман. Ушбу маърузам бошида Миллий қурултой фаолиятининг самарадорлиги ва фойдасига эътибор қаратдим. Умуман олганда, мен “Қурултой” номини мамлакатимиз сиёсий тизимидаги жуда муҳим давлат институти рамзи сифатида сақлаб қолишимиз керак, деб ҳисоблайман”, дея қўшимча қилган Қозоғистон раҳбари.

Шунингдек, Тўқаевнинг айтишича, янги парламентдаги мандатлар сони 145 тагача бўлиши мумкин, депутатлар эса ҳамма учун ягона тартиб асосида сайланади. Ҳозир уларнинг сони 148 нафарни ташкил этади. Парламентда 8 та қўмита бўлиши мумкинлиги қайд этилган. Бундан ташқари, Қосим-Жомарт Тўқаев Миллий қурултойда муҳим давлат тузилмалари аъзоларини парламент орқали тайинлашни таклиф қилган.

Эслатиб ўтамиз, аввалроқ Тўқаев халққа йўллаган мурожаати доирасида Қозоғистон парламентини бир палатали қилиш ва Сенатни тугатишни таклиф этган эди.Тўқаев бу масалани ҳал этиш учун референдум ўтказилишини ҳам қўшимча қилган. Кейинроқ Қосим-Жўмарт Тўқаев парламент ислоҳоти мамлакат ва Қозоғистон халқи тақдирига бевосита таъсир қиладиган масала эканини ҳам айтган.