“Хотини у билан жуда ёмон муносабатда”. Трамп Макроннинг устидан кулди (видео)

north_east

“Орқамни ўпсин”. Трамп омма олдида “қора шаҳзода”ни камситди (видео)

АҚШ Президенти Дональд Трамп Франция Президенти Эммануэль Макроннинг устидан кескин ҳазил қилиб, француз етакчисининг рафиқаси унга ёмон муносабатда бўлишини айтди. Бу ҳақда “The Guardian” хабар берди.

Нашрнинг ёзишича, Оқ уйнинг YouTube каналида Дональд Трамп иштирокидаги шахсий тушлик видеоёзуви қисқа вақтга пайдо бўлган. Бир оз вақт ўтгач, видео ўчириб ташланган, бироқ журналистлар унинг нусхасини олишга улгурган. Катта эҳтимол билан ушбу видео оммавий тарқатиш учун мўлжалланмаган.

Хабар қилинишича, Трамп яна НАТОни Эрондаги урушни қўллаб-қувватламагани учун танқид қилган. Бундан ташқари, у Эммануэль Макроннинг 2025 йилдаги воқеа – рафиқаси Брижит томонидан итариб юборилгани айтиладиган ҳолат устидан кулган.

АҚШ Президенти тушликдаги шерикларига Макрон билан яқинда бўлган телефон суҳбати ҳақида сўзлаб берган. У Макроннинг инглиз тилидаги талаффузини масхара қилган ва Макронлар оиласининг шахсий ҳаётига “тўхталиб ўтган”.

“Мен Францияга, Макронга қўнғироқ қилдим. Унинг рафиқаси у билан жуда ёмон муносабатда. Макрон ҳали ҳам хотинидан еган калтагидан кейин ўзига келолмаяпти”, деган Трамп.

Франциялик сиёсатчилар Трампнинг бу ҳаракатини кескин танқид қилиб, буни йўл қўйиб бўлмайдиган ҳолат деб атаган. Франция парламенти қуйи палатаси президенти Яэль Браун-Пиве ҳозирги вақтда бутун дунё келажаги муҳокама қилинаётганига эътибор қаратган.

“Эронда содир бўлаётган воқеалар миллионлаб одамлар ҳаётига таъсир қилмоқда, жанг майдонида одамлар ҳалок бўлмоқда, бизда эса бошқалар устидан куладиган ва масхара қиладиган Президент бор”, дейди у.

Макроннинг “Бўйсунмас Франция” партиясидаги рақиблари ҳам Трампнинг баёнотларини қоралаб, уни қўллаб-қувватлаган.

Эслатиб ўтамиз, 2025 йилнинг май ойида Франция Президенти Эммануэль Макрон Вьетнамга борган пайтида аёлидан тарсаки еган эди. Кейинроқ мазкур ҳолат акс этган видео ижтимоий тармоқларда катта шов-шувга сабаб бўлди.