Ким Украинадаги аскарларига ўзини ўлдиришни буюрди

Шимолий Корея етакчиси Ким Чен Ин Украинадаги урушда қатнашаётган ҳарбийларига асирга тушмаслик учун ўз жонига қасд қилишни буюрди. Бу ҳақда Марказий телеграф агентлиги томонидан унинг нутқидан келтирилган иқтибос орқали маълум бўлди.

Ким Чен Ин ўз жонига қасд қилиш амалиётини Пхеньянда Россиянинг Украинага қарши урушида ҳалок бўлган шимолий кореяликлар хотирасига бағишланган мемориал очилиши маросимида тилга олган. У асирга тушмаслик учун “ўзини портлатиб юборган” аскарларни камида икки марта эслатиб ўтган ва уларни қаҳрамон деб атаган.

“Буюк шарафни ҳимоя қилиш йўлида ҳеч иккиланмай ўз жонига қасд қилишни, худкушлик ҳужумини танлаган қаҳрамонлар... Улар улкан жасорат кўрсатган бўлсалар-да, ҳеч қандай мукофот кутмадилар. Улар қаҳрамонларча ҳалок бўлдилар”, дейди Ким Чен Ин.

КХДР ҳарбий хизматчилари Украина Қуролли кучларига асирга тушмаслик учун ўз жонига қасд қилаётгани ҳақида аввал ҳам ОАВда кўп ёзилган ва сиёсатчилар томонидан айтилган. Бироқ бу маълумотнинг расмий тасдиғи мавжуд эмас эди.
 
Масалан, 2024 йил охирида Оқ уй Миллий хавфсизлик кенгаши вакили Жон Кирби шимолий кореялик аскарларнинг асирга тушмаслик учун ўз жонига қасд қилгани билан боғлиқ бир неча ҳолатлар ҳақида гапирган. Ўшанда у буни “асирга тушган тақдирда Шимолий Кореядаги оилаларига нисбатан қилиниши мумкин бўлган қатағонлардан қўрқиш” билан изоҳлаган. Ўша пайтда Украина Президенти Владимир Зеленский ҳам бу ҳақда тўхталиб, Россия ҳарбийлари ва шимолий кореялик командирлар аскарларни асирга олишнинг иложи бўлмаслиги учун “ҳамма ишни қилаётганини” таъкидлаган.

“Биз кўряпмизки, Россия ҳарбийлари ва Шимолий Корея назоратчилари ушбу кореяликларнинг тирик қолишидан умуман манфаатдор эмас. Ҳамма нарса кореяликларни асирга олишимиз имконсиз бўлиши учун қилинмоқда: уларни уриб ўлдиришмоқда, шундай фактлар бор. Россияликлар уларни штурмларга минимал ҳимоя билан юбормоқда”, деган у ўз мурожаатида.

Эслатиб ўтамиз, жорий йилнинг 26 апрель куни Пхеньянда Украина армиясига қарши жанговар ҳаракатларда иштирок этган КХДР ҳарбий хизматчиларига бағишланган мемориал мажмуа ва музейнинг очилиш маросими бўлиб ўтганди. Фақатгина 2024 йилнинг ўзида КХДР Россияга жанговар ҳаракатларда қатнашиш учун 11 мингга яқин ҳарбий жўнатган бўлиб, НАТО маълумотларига кўра, уларнинг 1,5 мингга яқини ҳалок бўлган. Шимолий Корея расмийлари ўз ҳарбийлари жўнатилганини фақат 2025 йилдагина тасдиқлаб, улар “муқаддас миссия”ни бажараётганини маълум қилган.