Трамп Мадуро ва рафиқаси қаердалигини айтди

Венесуэла Президенти Николас Мадуро ва унинг рафиқаси Силия Флорес ҳозирда Нью-Йоркка йўл олаётган АҚШнинг Iwo Jima кемасида. Бу ҳақда АҚШ Президенти Дональд Трамп “Fox News” телеканалида эълон қилди. 

“Улар вертолётда олиб келинди ва вертолётда ажойиб саёҳат қилишди – ишончим комилки, улар бундан завқланишди. Лекин, улар кўп одамларни ўлдиришди, буни унутманг. Улар Нью-Йоркка олиб кетиляпти ва биласизки, Нью-Йоркда уларга айблов қўйилган”, деган Трамп.

Мадурога таклиф қилган чоралари ҳақидаги саволга жавобан Трамп:  

“Мен сиз таслим бўлишингиз кераклигини айтдим”, деди. 

Америка етакчисининг сўзларига кўра, у Мадуро билан бир ҳафта олдин гаплашган.

“Биз музокаралар олиб бордик. Мен у билан ўзим гаплашдим. Мен: Сиз таслим бўлишингиз керак. Сиз таслим бўлишингиз керак, дедим. У бундай қилмади”, дейди Трамп.

АҚШ раҳбари Мадуро билан сулҳ суҳбатлари қачон бўлиб ўтганига аниқлик киритаркан, “бир неча марта, тахминан бир ҳафта олдин”, деб жавоб қайтарган.  

Маълумот учун, АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган. Расмий Москва АҚШни Венесуэла Президенти ва унинг рафиқасини озод қилишга чақирмоқда. Венесуэла Бош прокурори Тарек Уильям Сааб Қўшма Штатлардан Венесуэла Президенти Николас Мадуро ва унинг рафиқаси Силия Флореснинг тириклигини тасдиқлашни талаб қилди ҳамда уларнинг тақдири учун Америка маъмуриятини жавобгар деб атади. 

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди.