Макрон Хитойни Украина урушини тугатишга кўмаклашишга чақирди

Франция Президенти Эммануэль Макрон Хитойдан Украинадаги урушни тинч йўл билан тўхтатиш учун саъй-ҳаракатларга ёрдам беришини сўради. Бугун, 4 декабрь куни Пекиндаги Халқ Бош саройида Хитой Халқ Республикаси Раиси Си Цзиньпин билан матбуот учрашуви вақтида Макрон Пекин Франция ташаббусларига қўшилишига умид билдирди. 

У Россиянинг Украинанинг муҳим инфратузилмасига зарбаларни камида вақтинча бўлса ҳам тўхтатишга эришиш муҳимлигини қайд этди. Президент, шунингдек, Франция ва Хитой БМТ Хавфсизлик Кенгашининг доимий аъзолари сифатида алоҳида масъулиятга эга эканини таъкидлади.

Си Цзиньпин Пекиннинг Украинада тинчликка эришиш учун ҳаракатларини давом эттиришини яна бир бор тасдиқлади ва Хитой конструктив роль ўйнашни давом эттиради, дея ишонтирди. Бироқ у можаро учун айбни фақат бир томон зиммасига юклашга қарши эканини билдирди.

Россия–Украина урушида Хитойнинг роли

Хитойни Украинага қарши Россиянинг урушдаги энг муҳим қўлловчиси сифатида кўришади. Пекин ва Москва ўртасида фаол алоқалар ва савдо сақланиб турибди. Хитой Россия ҳужумини қораламаган ва ўз позицияси билан амалда Москвага ёрдам бермоқда, деган баҳолар мавжуд. Шунингдек, Пекин Россия мудофаа саноати томонидан ишлатилиши мумкин бўлган икки мақсадли товарлар етказиб беришда айбланаётгани айтилмоқда.

Хитойга ташриф олдидан Макрон ва Украина Президенти Владимир Зеленский Парижда иттифоқчилар билан тинчлик музокаралари ҳолатини муҳокама қилган эди.

Эммануэль Макрон Хитойга тўртинчи давлат ташрифи билан келган. Си Цзиньпин ва унинг рафиқаси Пэн Лиюань Макрон ва рафиқаси Брижитни Халқ Бош саройида кутиб олди. Франция раҳбарига йирик бизнес намояндаларидан иборат 80 кишига яқин делегация ҳамроҳлик қилмоқда.

Келишмовчиликларни бартараф этиш

Учрашув давомида Макрон Си Цзиньпинни Франция ва Хитой ўртасидаги келишмовчиликларни юмшатишга чақирди. Унинг таъкидлашича, Париж ва Пекин ўртасида баъзан “қарашлар фарқи” юзага келади, аммо “барча учун фойда келтириш мақсадида уларни бартараф этиш – етакчиларнинг масъулияти”.

“Бизнинг вазифамиз – дунёда тинчлик ва барқарорлик учун ишлашни давом эттириш, жумладан Украина ва уруш таъсир этган бошқа минтақаларда ҳам”, деди Макрон. 

У, шунингдек, Хитойни “Катта еттилик” (G7) мамлакатлари билан ҳамкорлик қилишга, қоидаларга асосланган жаҳон иқтисодий тартибини қўллаб-қувватлашга чақирди.

Си Цзиньпин эса, ўз навбатида, Хитой Франция билан ҳамкорликка тайёрлигини билдириб, “ҳар қандай аралашувни истисно қилиш” ва икки давлат ўртасидаги “кенг қамровли стратегик ҳамкорликни янада барқарор қилиш” нияти борлигини таъкидлади.