Макрон келинойидан нега шапалоқ егани маълум бўлди

Франция Президенти Эммануэль Макрон эронлик актриса билан ёзишмалари туфайли рафиқаси Брижит Макрондан шапалоқ еган. Бу ҳақда француз журналисти Флориан Тардиф ўзининг “Деярли идеал жуфтлик” номли китобида ёзган.

“Воқеа шундаки, у [Брижит Макрон] таниқли шахсдан келган хабарни кўриб қолган. Бу эронлик актриса эди”, дейди Тардиф.

Китоб муаллифининг билдиришича, Макрон машҳур юлдуз билан “бир неча ой давомида” “платоник” (пок) муносабатда бўлган, бироқ кейинчалик унга “анча чегарадан чиққан хабарлар” ёзган. Жумладан, журналистнинг сўзларига кўра, Франция Президенти актрисага уни жуда гўзал деб ҳисоблашини ёзган.

Тардифнинг айтишича, унга бу воқеа ҳақида Макронга яқин бўлган шахслар сўзлаб берган.

Бироқ Брижит Макроннинг вакиллари бугун, 13 май куни “Le Parisien” нашрига берган интервьюсида журналистнинг сўзларини рад этган ва Биринчи хоним ҳеч қачон эрининг телефонини текширмаслигини билдирган.

Эслатиб ўтамиз, 2025 йил май ойида Макрон Жануби-Шарқий Осиё бўйлаб бир ҳафталик турне бошланишидан олдин рафиқаси Брижитдан шапалоқ еган эди. Вьетнамнинг Ханой аэропортида олинган кадрларда Президент самолёти эшиги очилгани ва ичкарида Эммануэль Макрон тургани кўринади. Шу пайт унинг хотинининг қўли пайдо бўлади (хонимнинг ўзи тўлиқ кўринмайди) ва унга енгил зарба беради. Ушбу кадрлар тармоқларда катта шов-шувга сабаб бўлган, видеонинг ҳақиқийлигини Елисей саройи ҳам тасдиқлаган эди.