Макрон Венесуэла мухолифатининг етакчиси Мачадо билан учрашди

Кеча, 13 апрель куни Франция Президенти Эммануэль Макрон Парижда Венесуэла мухолифати етакчиси Мария Корина Мачадо билан учрашув ўтказди. Бу ҳақда “Pravda” хабар берди.

Учрашувда Венесуэлада демократик ва тинч сиёсий ўтиш жараёни масаласи муҳокама қилинган.

Макроннинг айтишича, томонлар эркинликка содиқлик ва халқ иродасини ҳурмат қиладиган демократик ўзгаришларга эришиш муҳимлигини муҳокама қилган.

Мачадо ҳозирда Венесуэладан ташқарида бўлиб, у ўтган йил декабрь ойида Тинчлик бўйича “Нобель” мукофотини олиш учун мамлакатни тарк этган ва ҳозир Европа бўйлаб сафарда юрибди.

Шу билан бирга, Венесуэлада унга нисбатан тергов олиб борилмоқда. Мамлакатнинг вақтинчалик президенти Дельси Родригес Мачадо АҚШнинг ҳарбий ҳаракатларини қўллаб-қувватлагани учун жавоб бериши кераклигини айтган.

Венесуэла парламенти раҳбари Жорге Родригес эса хорижий аралашувни қўллаб-қувватлаш амнистия қонунига кирмаслигини билдирган, бироқ Мачадо мамлакатга қайтса, ҳибсга олинадими ёки йўқ – бу борада аниқ жавоб бермаган.

Эслатиб ўтамиз, 2025 йилги Тинчлик бўйича “Нобель” мукофоти венесуэлалик мухолифатчи Мария Корина Мачадога “Венесуэла халқи учун демократик ҳуқуқларни илгари суриш йўлидаги тинимсиз саъй-ҳаракатлари” учун берилган эди. Аммо у ўз мукофотини АҚШ Президенти Дональд Трампга топширди. 

“Нобель” қўмитаси шу ҳафта бошида медалнинг топширилиши Трамп автоматик равишда Тинчлик мукофоти совриндори бўлишини англатмаслигини айтиб чиқди. “Медаль эгасини ўзгартириши мумкин, аммо тинчлик бўйича Нобель мукофоти лауреатини ўзгартириб бўлмайди”, дейилади қўмита баёнотида.