Маск ҳам Трампнинг изидан Хитойга боради

АҚШ Президенти Дональд Трампнинг Хитойга амалга оширадиган ташрифида Американинг йирик компаниялари раҳбарлари ҳам иштирок этади. Бу ҳақда “Reuters” хабар берди.

Маълум қилинишича, миллиардерлар Илон Маск, Тим Кук, Ларри Калп ҳамда Келли Ортберг делегация таркибидан ўрин олган. Шунингдек, тадбирда Meta вакили Дина Пауэлл Маккормик, BlackRock раҳбари Ларри Финк, Blackstone бош директори Стивен Шварцман, Micron раҳбари Санжай Меҳротра, Mastercard бош директори Майкл Мибах, Qualcomm раҳбари Криштиано Амон ҳамда Visa бош директори Райан Макинерни ҳам қатнашади.

Cisco бош директори Чуск Роббинс ҳам сафарга таклиф қилинган, бироқ компания шу ҳафта молиявий ҳисоботлари эълон қилиниши сабаб директорнинг ташрифда қатнаша олмаслиги айтилган.

АҚШ ва Хитой савдо ҳамда инвестицияларни енгиллаштириш бўйича янги форумлар ташкил этишни муҳокама қилмоқда. Шунингдек, Пекин томонидан Boeing самолётлари, АҚШ қишлоқ хўжалиги маҳсулотлари ва энергетика соҳасига оид йирик харидлар эълон қилиниши мумкин. Манбаларга кўра, Хитой ва Boeing ўртасида 500 тагача 737 MAX самолётларини етказиб беришни назарда тутувчи йирик шартнома юзасидан музокаралар давом этмоқда. Битим амалга ошса, бу Хитойнинг 2017 йилдан буён Boeing’дан илк йирик буюртмаси бўлади.

Хитой Халқ Республикаси Раиси Си Цзиньпин ва Дональд Трамп ўртасидаги сўнгги учрашув ўтган йил октябрь ойида Жанубий Кореяда бўлиб ўтган эди. Унда томонлар савдо уруши кескинлигини камайтириш бўйича келишувга эришган.

Эслатиб ўтамиз, аввалроқ АҚШ Президенти Дональд Трамп жорий йилнинг 13–15 май кунлари Хитойга давлат ташрифи билан бориши тўғрисида хабар берилган эди.