Mbappe “Liverpul”ga o‘tishi mumkin – OAV

“Real Madrid” hujumchisi Kilian Mbappe yozgi transfer oynasining eng muhim shaxslaridan biriga aylanishi mumkin. Bu haqda “Fichajes” nashri xabar berdi.

Manbaga ko‘ra, “Liverpul” fransiyalik hujumchiga jiddiy qiziqish bildirmoqda. Angliya klubi Mbappening Madrid jamoasidagi vaziyatini diqqat bilan kuzatmoqda va agar “qirollik klubi” uning transferini muhokama qilishga tayyor bo‘lsa, futbolchini o‘z safiga qo‘shib olish variantini ko‘rib chiqadi.

Manbaga ko‘ra, “Real Madrid”da Mbappe bilan bog‘liq vaziyat jamoaning muvaffaqiyatsiz mavsumidan so‘ng keskinlashgan. Madridliklar yirik sovrinlarni qo‘lga kirita olmadi, Mbappe esa ayniqsa hal qiluvchi o‘yinlardagi ishtiroki sabab tanqidlarga uchragan futbolchilar qatorida bo‘ldi. Shuningdek, norozilik futbolchining jamoaning bir qismi hali mavsumni yakunlamagan paytda ta’tilga chiqish qarori bilan ham bog‘liq ekani ta’kidlanmoqda. Bu holat muxlislar va ayrim klub vakillari tomonidan turlicha baholangan.

Shu fonda Mbappening “Real Madrid”dagi kelajagi borasidagi mish-mishlar yanada kuchaydi. Klub hozircha bu borada rasmiy qaror qabul qilmagan, biroq uning ketishi ehtimoli tobora ko‘proq muhokama qilinmoqda.

Qayd etilishicha, “Liverpul” avval ham Mbappega qiziqish bildirgan. Ingliz klubi bunday transfer jamoani sezilarli darajada kuchaytirishiga ishonmoqda. Biroq futbolchining yuqori transfer qiymati, amaldagi shartnomasi va “Real Madrid”dagi mavqei tufayli ehtimoliy kelishuv ancha murakkab bo‘lib qolmoqda. Yakuniy qaror esa yozgi transfer oynasida e’lon qilinishi kutilmoqda.

Eslatib o‘tamiz, avvalroq “Real Madrid” muxlislari fransiyalik hujumchi Kilian Mbappening klubni tark etishini talab qilib petitsiya boshlagani va bu atigi bir kun ichida 12 milliondan ortiq imzo to‘plagani haqida xabar berilgandi.