Qoraqalpog‘istonda “Media haftalik” yakuni: yangi avlod, yangi tafakkur, yangi bosqich

O‘zbekistonda tashkil etilgan eng yirik “Media haftalik”ning Qoraqalpog‘istondagi dasturi 5 kun davomida juda yuqori atmosferada bo‘lib o‘tdi.

Bu tashabbus mamlakat media makonida yangi tafakkurni qaror toptirish, zamonaviy yondashuvlarni shakllantirish va yangi avlod qarashlarini mustahkamlashga qaratilgan keng ko‘lamli intellektual harakat sifatida namoyon bo‘ldi.

Ommaviy axborot vositalari uchun kontent tayyorlash markazi hamda qator hamkor tashkilotlar tashabbusi bilan tashkil etilgan ushbu dastur besh kun davomida media sohasining turli qatlam vakillarini bir nuqtada jamladi. 700 nafardan ortiq ishtirokchi orasida jurnalistlar, blogerlar, axborot xizmati xodimlari, shuningdek, zamonaviy kontent yaratish bilan shug‘ullanuvchi mutaxassislar faol ishtirok etishdi.

Ayniqsa, ishtirokchilarning eng katta qismini 500 nafardan ziyod yoshlar — mobilograf va SMM mutaxassislari tashkil etgani alohida ahamiyatga ega. Bu holat media sohasida yangi avlodning faol, tashabbuskor va qat’iy qadamlar bilan kirib kelayotganini yaqqol namoyon etdi.

“Media haftalik” doirasida ko‘tarilgan masalalar ko‘lami va mazmuni jihatidan ham alohida e’tiborga loyiq. Bir nechta muhim yo‘nalishlarni qamrab olgan tadbirda amaliyot ustuvorlik qildi. Ishtirokchilar axborotni tayyorlash, uni chuqur tahlil etish va jamoatchilikka ta’sirchan yetkazishning zamonaviy mexanizmlarini bevosita tajriba orqali o‘zlashtirdilar.

Ayniqsa, feyk axborotlar va dezinformatsiyaga qarshi kurashish, faktcheking madaniyatini shakllantirish kabi masalalar muhokamaning markazida bo‘ldi. Zero, bugungi axborot makonida ishonchlilik eng qimmat resursga, ayni paytda eng nozik muvozanatga aylanib bormoqda. Shu ma’noda, mazkur yo‘nalishdagi sa’y-harakatlar media muhitini sog‘lomlashtirishning muhim sharti sifatida namoyon bo‘ldi.

Sun’iy intellekt texnologiyalaridan foydalanish masalasi ham tadbir kun tartibining ustuvor yo‘nalishlaridan biri sifatida ko‘rildi. Ushbu texnologiya media sohasini tubdan o‘zgartirishga qodir kuch sifatida baholanib, ishtirokchilarga uning imkoniyatlarini amaliy jihatdan sinab ko‘rish imkoniyati yaratildi. Bu esa yaqin kelajakda media mahsulotlarni yaratish va tarqatish jarayonlarida sifat jihatdan yangi bosqichga o‘tish uchun zamin hozirlamoqda.

Shu bilan birga, 10 ming nafar SMM mutaxassisini tayyorlashga qaratilgan loyiha doirasida erishilgan natijalar ham diqqatga sazovor. Xususan, 7 ming nafardan ortiq yoshlarning qamrab olingani va 2 ming nafardan ziyod ishtirokchining kurslarni muvaffaqiyatli yakunlagani sohada kadrlar salohiyati izchil ravishda oshib borayotganini ko‘rsatadi.

Umuman olganda, Qoraqalpog‘istonda o‘tkazilgan “Media haftalik”ni media sohasida yangi bosqichni boshlab bergan, mazmun va sifat jihatidan yangi burilish nuqtasiga aylangan muhim voqea sifatida baholash mumkin. Bu tashabbus nafaqat bugungi kun ehtiyojlariga javob beradi, balki kelajak media makonining yo‘nalish va tamoyillarini belgilab beruvchi muhim platforma sifatida ham ahamiyat kasb etadi.

Reklama huquqi asosida