Қорақалпоғистонда “Медиа ҳафталик” якуни: янги авлод, янги тафаккур, янги босқич

Ўзбекистонда ташкил этилган энг йирик “Медиа ҳафталик”нинг Қорақалпоғистондаги дастури 5 кун давомида жуда юқори атмосферада бўлиб ўтди.

Бу ташаббус мамлакат медиа маконида янги тафаккурни қарор топтириш, замонавий ёндашувларни шакллантириш ва янги авлод қарашларини мустаҳкамлашга қаратилган кенг кўламли интеллектуал ҳаракат сифатида намоён бўлди.

Оммавий ахборот воситалари учун контент тайёрлаш маркази ҳамда қатор ҳамкор ташкилотлар ташаббуси билан ташкил этилган ушбу дастур беш кун давомида медиа соҳасининг турли қатлам вакилларини бир нуқтада жамлади. 700 нафардан ортиқ иштирокчи орасида журналистлар, блогерлар, ахборот хизмати ходимлари, шунингдек, замонавий контент яратиш билан шуғулланувчи мутахассислар фаол иштирок этишди.

Айниқса, иштирокчиларнинг энг катта қисмини 500 нафардан зиёд ёшлар — мобилограф ва SMM мутахассислари ташкил этгани алоҳида аҳамиятга эга. Бу ҳолат медиа соҳасида янги авлоднинг фаол, ташаббускор ва қатъий қадамлар билан кириб келаётганини яққол намоён этди.

“Медиа ҳафталик” доирасида кўтарилган масалалар кўлами ва мазмуни жиҳатидан ҳам алоҳида эътиборга лойиқ. Бир нечта муҳим йўналишларни қамраб олган тадбирда амалиёт устуворлик қилди. Иштирокчилар ахборотни тайёрлаш, уни чуқур таҳлил этиш ва жамоатчиликка таъсирчан етказишнинг замонавий механизмларини бевосита тажриба орқали ўзлаштирдилар.

Айниқса, фейк ахборотлар ва дезинформацияга қарши курашиш, фактчекинг маданиятини шакллантириш каби масалалар муҳокаманинг марказида бўлди. Зеро, бугунги ахборот маконида ишончлилик энг қиммат ресурсга, айни пайтда энг нозик мувозанатга айланиб бормоқда. Шу маънода, мазкур йўналишдаги саъй-ҳаракатлар медиа муҳитини соғломлаштиришнинг муҳим шарти сифатида намоён бўлди.

Сунъий интеллект технологияларидан фойдаланиш масаласи ҳам тадбир кун тартибининг устувор йўналишларидан бири сифатида кўрилди. Ушбу технология медиа соҳасини тубдан ўзгартиришга қодир куч сифатида баҳоланиб, иштирокчиларга унинг имкониятларини амалий жиҳатдан синаб кўриш имконияти яратилди. Бу эса яқин келажакда медиа маҳсулотларни яратиш ва тарқатиш жараёнларида сифат жиҳатдан янги босқичга ўтиш учун замин ҳозирламоқда.

Шу билан бирга, 10 минг нафар SMM мутахассисини тайёрлашга қаратилган лойиҳа доирасида эришилган натижалар ҳам диққатга сазовор. Хусусан, 7 минг нафардан ортиқ ёшларнинг қамраб олингани ва 2 минг нафардан зиёд иштирокчининг курсларни муваффақиятли якунлагани соҳада кадрлар салоҳияти изчил равишда ошиб бораётганини кўрсатади.

Умуман олганда, Қорақалпоғистонда ўтказилган “Медиа ҳафталик”ни медиа соҳасида янги босқични бошлаб берган, мазмун ва сифат жиҳатидан янги бурилиш нуқтасига айланган муҳим воқеа сифатида баҳолаш мумкин. Бу ташаббус нафақат бугунги кун эҳтиёжларига жавоб беради, балки келажак медиа маконининг йўналиш ва тамойилларини белгилаб берувчи муҳим платформа сифатида ҳам аҳамият касб этади.

Реклама ҳуқуқи асосида