Мексика Исроил элчисига нисбатан суиқасднинг олдини олди – ОАВ

Эрон Ислом инқилоби қўриқчилари корпуси (ЭИИҚК) Мексикадаги Исроил элчиси Эйнат Кранц Найгерга суиқасд уюштиришни режалаштирган, бироқ бу уринишни Мексика хавфсизлик хизмати жорий йилнинг ёзида фош этиб, олдини олган. Бу ҳақда АҚШ ва Исроил расмийларига таяниб, “Axios” нашрининг журналисти Барак Равид хабар берди.

Манбаларнинг айтишича, бу операцияни ЭИИҚК таркибидаги “11000-бўлинма” тайёрлаган. Айнан шу бўлинма сўнгги ойлар ичида Австралия ва Европада яҳудийлар ҳамда исроилликларга қарши ҳужумлар уюштиришга уринган, деган тахминлар мавжуд.

Тайёрлов ишлари 2024 йил охирида бошланган ва Венесуэладаги Эрон элчихонаси орқали бир неча йил давомида Эрон агентларини Лотин Америкасида ёллаш билан шуғулланган бўлинма аъзоси томонидан амалга оширилган.

“Ушбу “элчини ўлдириш фитнаси” 2025 йилнинг биринчи ярмида фаол бўлган, бироқ ёз ойларида унинг олди олинди. Ҳозирча хавф йўқ, фитна тўлиқ бартараф этилган”, дейди АҚШ расмийси.

Исроил Ташқи ишлар вазирлиги вакили Омер Марморштейн Х орқали Мексика хавфсизлик ва ҳуқуқни муҳофаза қилиш идораларига миннатдорлик билдирган.