Мерц Трампга футболка совға қилди (видео)

Германия канцлери Фридрих Мерц G7 (“Катта еттилик”) саммити давомида АҚШ Президенти Дональд Трампга ноодатий совға топширди. Бу ҳақда “New York Post” хабар берди.

Учрашув бошланишидан олдин Мерц Трампга Германия терма жамоасининг оқ рангдаги футболкасини совға қилди. Футболканинг орқа томонига Трампнинг фамилияси ва 47-рақам туширилган эди. АҚШ Президенти эса канцлернинг совғасини бошқа сиёсатчиларга кўрсатиб, футболкани йиғган ва стол устига қўйган.

Журналистларнинг таъкидлашича, Мерц ушбу футболкани Трампнинг 14 июнь куни нишонланган 80 йиллиги муносабати билан совға қилган.

Франция раислигидаги G7 саммити 15–17 июнь кунлари Женева кўли бўйидаги Эвиан-ле-Бен шаҳрида бўлиб ўтмоқда. “Катта еттилик” мамлакатлари раҳбарлари учрашуви олдидан Швейцариянинг Женева шаҳридаги тартибсизликлар эҳтимоли сабаб қимматбаҳо бутиклар ва банкларнинг деразалари фанера билан ёпиб қўйилган.

Эслатиб ўтамиз, аввалроқ АҚШ Президенти Дональд Трампнинг Францияда бўлиб ўтаётган G7 саммитидаги кўриниши унинг саломатлиги борасидаги муҳокамаларни кўпайтирганди.

Илгари қаттиқ ва узоқ давом этадиган қўл сиқишлари билан танилган Трамп бу сафар Франция Президенти Эммануэль Макрон билан анча сокин саломлашган.