Мундиалнинг плей-офф босқичи Мексикадан кўчирилиши мумкин 

FIFA 2026 йилги Жаҳон чемпионатининг қитъалараро плей-офф босқичини Мексикадан бошқа жойга кўчириш имкониятини кўриб чиқмоқда. Бу ҳақда “The Athletic” нашри хабар берди.

Конго, Ямайка ва Янги Каледония терма жамоалари иштирокидаги плей-офф босқичи жорий йилнинг 26–31 март кунлари Мексиканинг Гвадалахара шаҳрида ўтказилиши режалаштирилган.

Манбага кўра, жорий йилнинг 22 февраль куни “Халиско янги авлоди”  гиёҳванд моддалар картели етакчиси Немесио Осегуэра Сервантеснинг (лақаби “Эль Менчо”) ўлдирилишидан сўнг Мексиканинг бир нечта ҳудудларида, жумладан, Гвадалахарада ҳам тартибсизликлар бошланган. Намойишчилар полицияга ҳужум қилган, автомобилларга ўт қўйилган ва дўконлар талон-торож қилинган. Расмийлар “қизил код” эълон қилиб, аҳолини уйда қолишга чақирди. Мамлакат аэропортларида 100 дан ортиқ рейс бекор қилинган.

Шу билан бирга, Мексика Президенти Клаудия Шейнбаум мамлакатнинг аксарият ҳудудларида вазият барқарор эканини маълум қилмоқда.

Исми ошкор этилмаган FIFA ходимининг айтишича, ташкилот ўйинларни бошқа санага қолдиришни фақат сўнгги чора сифатида кўради. Шу сабабли Мексикадаги вазият яхшиланмаса, ўйинлар бошқа жойга кўчирилиши мумкин.

Маълумот учун, Конго, Ямайка ва Янги Каледония терма жамоалари иштирокидаги плей-офф босқичи ғолиби Ўзбекистон билан биргаликда Жаҳон чемпионатининг “К” гуруҳидан ўрин олади.