Мюнхен хавфсизлик конференцияси бошланмоқда. Ундан нималар кутиляпти?

62‑Мюнхен хавфсизлик конференцияси (МХК) жорий йилнинг 13-15 февраль кунлари Hotel Bayerischer Hof ва Rosewood Munich меҳмонхоналарида бўлиб ўтади. Бу ҳақда конференциянинг расмий сайтида хабар берилди.

Маълум қилинишича, конференцияни МХК раиси Вольфганг Ишингер бошқаради. Дунёнинг турли минтақаларидан юзлаб етакчилар хавфсизлик сиёсати билан боғлиқ муаммоларни муҳокама қилади. Конференцияда ҳозирга қадар 50 та давлат ва ҳукумат раҳбарлари иштирок этишини тасдиқлаган. Бу айниқса, кўплаб Европа давлатлари раҳбарларини ва Германия федерал ҳукумати делегациясини, шунингдек, канцлер Фридрих Мерц бошчилигидаги кенг ваколатли гуруҳни ўз ичига олади.

Дунё бўйлаб беқарорлик ва можаролар кескин ошиб бораётган бир пайтда бу йилги Мюнхен хавфсизлик конференцияси муҳим бурилиш нуқтасида ўтказилмоқда. Конференцияда муҳокама қилинадиган мавзулар қаторига Европа хавфсизлиги ва мудофаа, трансатлантик муносабатларнинг келажаги, кўп томонлама ҳамкорликни қайта жонлантириш, глобал тартиб бўйича рақобат қилувчи қарашлар, минтақавий можаролар ва технологик ривожланишнинг хавфсизликка таъсири киради.

“Мюнхен хавфсизлик конференцияси 2026 йил ҳам халқаро хавфсизлик сиёсатининг асосий масалалари бўйича глобал мулоқот учун муҳим платформа бўлиб хизмат қилади. Шу йил бизнинг Вашингтон, АҚШ ва АлУла, Саудия Арабистони шаҳарларида ўтказилган Мюнхен етакчилар учрашувларида бошланган суҳбатлар аллақачон қимматли импульсларга эга бўлди. Шу асосга таянган ҳолда МХК стратегик муҳокамаларни чуқурлаштириш ва бугунги энг долзарб глобал муаммоларни ҳал қилиш учун зарур бўлган ҳамкорликни мустаҳкамлашга ноёб имконият беради”, дейди Мюнхен хавфсизлик конференцияси раиси Вольфганг Ишингер.

Конференция тадбирининг барча қисмлари Мюнхен қоидаси асосида ўтқазилади: иштирокчилар бир-бири билан мулоқот қилиши ва фаол бўлиши керак, маъруза ўқиш ёки бир-бирини эътиборсиз қолдириш тавсия этилмайди. Саҳнада бўлиш ёки саҳна ортида қолишидан қатъи назар, меҳмонлар бир-биридан ўрганиши ва мулоқот қилиши, спикерлар эса саволларга жавоб бериб, аудитория билан тенг даражада суҳбатлашишга тайёр бўлиши керак.

Эъзоза Олимова