Нетаньяху Ғазонинг 70 фоиз қисмини эгаллашни буюрди (видео)

Исроил Бош вазири Биньямин Нетаньяху Исроил мудофаа армиясига (ЦАХАЛ) Ғазо сектори ҳудуди устидан назоратни 70 фоизгача кенгайтириш ҳақида буйруқ берди. Бу ҳақда у Иордан дарёсининг Ғарбий Соҳилида бўлиб ўтган конференциядаги нутқида сўз очди.

“Биз 50 фоизини назорат қилаётган эдик, кейин 60 фоизини эгалладик. Менинг буйруғим – 70 фоизга яқинлашиш, ишни мана шундан бошлайлик. Биз ҲАМАСни ҳар томондан сиқиб бормоқдамиз. Уларнинг қолдиқлари билан ҳам шуғулланамиз”, дейди Нетаньяху. 

Тингловчилардан бири Исроил эксклавнинг бутун ҳудудини эгаллаши кераклигини ҳайқириб айтганида, ҳукумат раҳбари бу йўналишда ҳам иш олиб борилаётганини таъкидлаган.

“Reuters”нинг ёзишича, ҳозирда Исроил Ғазо сектори ҳудудининг 64 фоизини эгаллаб турибди. Аммо “The Wall Street Journal” (WSJ) нашри 25 май куни бошқа рақамларни келтирган. Газета маълумотларига кўра, 2026 йилнинг май ойига келиб ЦАХАЛ ҳудуднинг 59 фоизини назорат қилаётган бўлган.

2025 йилнинг октябрь ойида Исроил ва ҲАМАС ўртасида келишув имзоланган пайтда ЦАХАЛ Ғазонинг 53 фоизини эгаллаб турган эди. Ушбу ҳужжат Исроил армияси аввалдан келишилган чизиққача ортга чекинишини ва натижада назорат остидаги ҳудуднинг қарийб 20 фоизини йўқотишини кўзда тутганди. Бироқ WSJ манбаларининг сўзларига кўра, ЦАХАЛ турли участкаларда бу чизиқни бир неча бор суришни давом эттирган. Сунъий йўлдошдан олинган суратлар ҳам Исроил ушбу чизиқни фаол равишда мустаҳкамлаётгани ва янги ҳарбий таянч пунктларини қураётганини кўрсатмоқда.

Эслатиб ўтамиз, аввалроқ БМТ Исроилни можаролар вақтида жинсий зўравонлик қўллаган томонлар “қора рўйхати”га киритгани ҳақида хабар берилган эди.