NYT Пентагонни судга берди

АҚШнинг “The New York Times” (NYT) газетаси Пентагоннинг журналистларга қўйган чекловлари АҚШ Конституциясига зид эканини иддао қилиб, Вашингтон округ судига даъво аризаси билан мурожаат қилди. Бу ҳақда нашр кеча, 4 декабрь куни хабар берди.

Газета маълумотига кўра, октябрь ойида кучга кирган ички қоидалар журналистлардан 21 бетли ҳужжатга имзо қўйишни талаб қилади. Ҳужжатда манбалар билан мулоқот ва ахборот олиш учун сўров юбориш бўйича чекловлар мавжуд. Нашрнинг фикрича, ҳарбий идоранинг мақсади тарихан журналистлар учун очиқ бўлган ҳудудларни улар учун ёпиқ қилишдир, бу эса журналистларга Пентагондаги фаолият ва раҳбарият ҳаракатларини эркин ва холис ёритишга тўсқинлик қилади.

NYT суддан Пентагоннинг янги қоидаларини журналистларга нисбатан қўллашни тақиқлашни, шунингдек, биринчи тузатишга зид бўлган қоидаларни ноқонуний деб топишни сўрамоқда. Масалан, газета ҳукумат ходимларидан махфий маълумот сўрашни тақиқловчи бандни танқид қилмоқда, чунки бу “қонуний ва одатий янгилик йиғиш усулларини” чеклайди.

Пентагон вакиллари эса янги қоидалар миллий хавфсизликка зарар етказадиган маълумот оқимининг олдини олиш учун кераклигини айтган. Октябрда улар идора биноларига кириш “имтиёз” эканини ва уни тартибга солиш лозимлигини билдирган.

NYT’нинг айтишича, ўнлаб журналистлар янги талабларни бажармай, ўз рухсатномаларини топширган. Баъзи нашрлар қоидаларни очиқ танқид қилган. ABC News, CBS News, CNN, “Fox News” va NBC News нашрларига кўра, “бу сиёсат мислсиз бўлиб, журналистларни ҳимоя қилувчи асосий механизмларга таҳдид солади”.

Бундан аввал, февраль ойида янги ички қоидалар пайдо бўлишидан олдин, янги вазир Пит Ҳегсет бир қанча газеталарни, жумладан, NYT’ни, Пентагонда узоқ йиллик фаолияти учун махсус офисдан маҳрум қилган. Уларнинг ўрнини консерватив нашрлар, масалан, “Newsmax” ва “Breitbart News” эгаллаган. Май ойида эса Ҳегсет журналистлар аксарият Пентагондаги ҳудудларда махсус ходимсиз бўла олмаслигини буюрган.

Эслатиб ўтамиз, аввалроқ Дональд Трамп Британиянинг BBC компаниясини унга нисбатан “ёлғон, туҳмат, ҳақоратли ва ғазаб уйғотувчи баёнотлар” берганликда айблаб, 1 миллиард долларгача зарар ундириш учун судга бериш билан таҳдид қилганди. Шундан сўнг, BBC телерадиокомпанияси АҚШ Президенти Дональд Трампдан расмий узр сўраб, компенсация тўлаш ҳақидаги талабларини рад этганди.