“Одамларнинг ёнаётганини кўрдим”. Швейцариядаги курортда нималар бўлди?

Швейцариянинг Кран-Монтана шаҳарчасидаги Le Constellation (“Юлдуз туркуми”) барида Янги йил кечасида содир бўлган ёнғин оқибатида камида 40 киши ҳалок бўлди, 80 нафардан 115 нафаргача одам турли даражадаги жароҳатлар билан шифохонага ётқизилди. Ёнғиннинг расмий сабаби ҳозирча эълон қилинмаган. Аммо тарқалган фото ва видеоларга қараганда, барда ишлатилган бенгал чироқлари туфайли шифт ёниб кетган. Гувоҳлар бўлган воқеаларни тўлиқ тартибсизлик ва даҳшатли фильмга ўхшатмоқда. Бу ҳақда BBC хабар берди.

Исмини ошкор этмасликни сўраган 18 ёшли маҳаллий йигитнинг айтишича, Янги йил кечасида унинг акаси барда бўлган. Йигит шовқинни эшитиб, тутунни кўрган ва дарҳол бар томонга югурган. Аввал ойнани синдирган, сўнг ичкарига кирган.

“Мен одамларнинг ёниб кетаётганини кўрдим. Бошидан оёғигача куйиб кетган, кийимсиз одамларни кўрдим. Бу даҳшатли эди”, дейди у.

Унинг акаси жабрланмаган.

Франциялик икки қиз – Эмма ва Албан BFMTV телеканалига ёнғин бошланган пайтда улар бар ичида бўлганини айтган. Уларнинг сўзларига кўра, ёнғинга бенгал чироқлари сабаб бўлган бўлиши мумкин: официантлардан бири бенгал чироқларини шампань шишаларига қистирган.

Швейцариянинг “Blick” таблоиди мотоцикл шлемини кийган қиз йигитнинг елкасида ўтирган ҳолда туширилган суратни эълон қилди. Қиз қўлида иккита шампань шишасини ушлаб турган, уларнинг бўйин қисмига ёниб турган бенгал чироқлари маҳкамланган.

BBC’нинг фактчекинг хизмати бошқа ракурсдан олинган суратларни таҳлил қилиб, уларнинг ҳақиқийлигини тасдиқлаган. Уларда камида тўрт киши шампань шишалари ва уларга бириктирилган бенгал чироқлари билан қўлларини шифт томон кўтаргани кўринади.

26 ёшли Илан Ашур яқин атрофдаги муассасалардан бирида ишлаган ва ёнғин ҳақида эшитиши биланоқ воқеа жойига борган. “Reuters” билан суҳбатда у ҳодисани даҳшатли фильмга қиёслаган: ёнаётган одамлар қичқирган, ёрдам сўраган. Ашур ўша пайтда барда бўлган энг яқин дугонасини қутқаришга уринган. У қиз унинг қўлида жон берган.

Лоран исмли маҳаллий аҳоли вакили “Blick” нашрига бар ичида ёнғин хавфсизлиги чораларининг жуда суст бўлганини айтган. Масалан, ташриф буюрувчилар бино ичида чекиши мумкин бўлган ва бунга “кўз юмилган”.

Кран-Монтана – машҳур Алп тоғлари курорти бўлиб, бу ерда халқаро чанғи мусобақалари ҳам ўтказилади. Энг яқин мусобақалар жорий йил январь охирига режалаштирилган эди. “Юлдуз туркуми” бари нархлари жиҳатидан нисбатан ҳамёнбоп ҳисобланган. Унинг икки қавати ва террассаси тахминан 300 кишини сиғдира олган.

Янги йил кечасида муассаса тўла бўлган, бу ерда нафақат маҳаллий аҳоли, балки сайёҳлар ҳам бўлган. 2 январь ҳолатига кўра, Франция ва Италия расмийлари жабрланганлар ёки бедарак йўқолганлар орасида ўз фуқаролари борлигини маълум қилган.

Вале кантони парламенти аъзоси Стефан Гансер Франциянинг RTL телеканалига берган интервьюсида тахминан 40 киши ҳалок бўлганини, 80-100 киши эса оғир тан жароҳатлари билан шифохоналарда ётганини айтган. Унинг сўзларига кўра, кўплаб жабрланганларда учинчи даражали куйишлар бор ва уларнинг ҳаёти катта хавф остида.

Воқеа жойида ишлаётган BBC журналисти Сара Рейнсфорднинг айтишича, жабрланганлар орасида ўсмирлар жуда кўп – бу кантонда 16 ёшдан бошлаб спиртли ичимлик истеъмол қилишга рухсат берилган ва бар ёшлар орасида машҳур бўлган.

Эмма ва Албан ёнғин бошланиши билан дарҳол тиқилинч юзага келганини айтган – улар бўлган хона кичик, чиқиш жойи тор, кўчага олиб чиқадиган зина эса “янада торроқ” бўлган.

“Тахминан 200 киши 30 сония ичида жуда тор зинапоядан чиқиб кетишга уринди”, дейди улар.

Жабрланганлар Швейцария, Франция, Бельгия ва Италия шифохоналарига етказилган. Польша Бош вазири Дональд Туск мамлакати 14 кишини даволаниш учун қабул қилишга тайёр эканини билдирган.

Ҳозирча фақат битта ҳалок бўлган шахснинг исми маълум – у Италия фуқароси, 16 ёшли Эммануэле Галлепини. Унинг вафоти ҳақида Италия Гольф федерацияси хабар берган. Таъқдири ҳозирча номаълум бўлган бошқа ёшларнинг ота-оналари ижтимоий тармоқларда уларнинг суратларини жойлаб, ёрдам сўрамоқда. Рим папаси Лев XIV ҳам ҳалок бўлганлар оилаларига ҳамдардлик билдирган.

Эслатиб ўтамиз, аввалроқ мазкур ҳодиса оқибатида вафот этганлар ва жабрланганлар орасида Ўзбекистон Республикаси фуқаролари аниқланмагани ҳақида хабар берилган эди.