Орбан 14-марта Путин билан учрашди. Бу гал Лавров ҳам “саҳна”га қайтди

Бугун, 28 ноябрь куни Венгрия Бош вазири Виктор Орбан лавозимга келгандан бери 14-марта Россия Президенти Владимир Путин билан учрашди. Бу ҳақда Орбаннинг ўзи Кремлдаги музокаралар олдидан маълум қилди 

“Бу менинг Бош вазир сифатида сиз билан 14-маротаба учрашувим. Менимча, ҳозирги тарихий вазиятни ҳисобга олганда, халқларимиз ўртасидаги ҳамкорликни ривожлантиришда ҳақиқатан ҳам катта ишлар амалга оширилди ва мен чин дилдан умид қиламанки, биз яна кўп ишлар қиламиз.

Ҳурматли Президентга маълумки, биз суверен ташқи сиёсат йўналишини амалга оширамиз. Биз Россия йўналишида қатъиймиз ва муҳим соҳаларда ҳамкорлик давом этмоқда – биз ташқи босимга берилмадик ва бу муҳим соҳаларда ҳамкорликни тўхтатмадик”, деди Орбан.

Шунингдек, у Россиядан энергетик ресурсларнинг ўтмишда, ҳозир ва келажакда барқарор етказиб берилиши Венгриянинг энергетика хавфсизлигининг асоси эканини таъкидлади. У Россиянинг энергетик таъминоти барқарорлиги ва прогнозланувчанлигини юқори баҳолади ва Венгрия Россия билан энергетика диалоги ҳамкорлигини давом эттиришга қизиқиш билдираётганини қайд этди.

“Украина Венгриянинг қўшниси бўлгани учун, Венгрия Украина низосининг таъсирини тўлиқ ҳис қилмоқда, шу жумладан сезиларли иқтисодий йўқотишлар ҳамда ҳарбий ҳаракатлар оқибатида иқтисодий ҳамкорлик блокланиши. Бу ҳам Европа, ҳам биз учун тўғри.

Сизга олдинги учрашувимизда айтганимдек: Венгрия тинчликка қизиқиш билдирмоқда ва сўнгги пайтда эълон қилинган тинчлик ташаббуслари охир-оқибатда шу тинчликка олиб келади деб умид қиламиз”, деди Орбан.

Путин эса Орбаннинг Украина масаласи бўйича уйғун ва мувозанатли позициясини яхши билишини қайд этди. 

“АҚШ Президенти билан учрашув имконияти бўйича шу қадар тез ва ижобий муносабат билдирганингиз учун раҳмат. Бу Дональднинг таклифи эди, у дарҳол шундай деди: Венгрия билан яхши муносабатларимиз бор ва сен билан Викторнинг муносабатлари яхши, мен ҳам бу вариантни таклиф қиламан. Албатта, биз мамнуният билан розилик билдирдик.

Агар музокараларимиз жараёнида Будапешт майдончасидан фойдаланиш масаласи юзага келса, мен буни ҳам жуда қувонч билан қабул қиламан ва сизга кўмаклашишга тайёрлигингиз учун миннатдорлик билдираман”, деди Путин.

Музокараларда Россия томонидан Ташқи ишлар вазири Сергей Лавров, Ҳукумат раиси ўринбосари Александр Новак ва Президент ёрдамчиси Юрий Ушаков иштирок этди. Венгрия томонидан эса Ташқи иқтисодий алоқалар ва хорижий ишлар вазири Петер Сийярто, Қурилиш ва транспорт вазири Янош Лазар ҳамда Венгрия Бош вазирининг миллий хавфсизлик масалалари бўйича бош маслаҳатчиси Марцел Биро қатнашди.

Россия ва Венгрия Ташқи ишлар вазирлари Сергей Лавров ва Петер Сийярто икки давлат раҳбарлари музокаралари бошланишидан олдин Кремлда узоқ вақт давомида суҳбат қурди. “Интерфакс” мухбири хабар беришича, Россия президенти Владимир Путин ва Венгрия Бош вазири Виктор Орбан келиши кутилган вақтда вазирлар Дипломатия қабинетида аввал туриб, сўнгра қўшни креслоларга ўтириб, жонли суҳбатни давом эттирган. Уларнинг учрашуви 45 дақиқа атрофида давом этди.

Қайд этиш жоиз, сўнгги пайтларда Лавров Путиннинг хорижий сафарларида кўринмай қолгани тарли тахминларни илгари сурганди. Масалан, бу Путиннинг ундан жаҳли чиққани, чунки Лавров америкалик мавқедоши Марко Рубио билан телефон суҳбатида Путин ва Трампнинг Будапештда ўтиши керак бўлган саммитини барбор қилгани айтилганди.

Эслатиб ўтамиз, кеча, 27 ноябрь куни Россия Президенти Владимир Путин Қирғизистонга ташрифи якунлари ва Коллектив хавфсизлик шартномаси ташкилоти саммити бўйича матбуот анжуманида Россия Ташқи ишлар вазири Сергей Лавров АҚШ Давлат котиби Марко Рубио билан суҳбатлашгани учун “қора рўйхатга тушди”, деган гапларни аҳмоқлик деб атаганди.