Оскар юрак муаммоси сабаб фаолиятини якунламоқда

“Челси”нинг собиқ ярим ҳимоячиси Оскар юрак билан боғлиқ жиддий муаммо аниқланганидан сўнг профессионал футболчилик фаолиятини муддатидан олдин якунлашга мажбур бўлмоқда. Бу ҳақда “Goal” нашри хабар берди.

34 ёшли футболчи Бразилиянинг “Сан-Паулу” клубида машғулот вақтида ўтказилган жисмоний синов чоғида ҳушидан кетган. Шундан сўнг у шифохонага ётқизилиб, кузатув учун реанимация бўлимига жойлаштирилган эди. Текширувлар натижасида Оскарда юрак уриш тезлиги ва қон босимининг кескин пасайиши билан кечувчи вазовагал ҳушдан кетиш ҳолати аниқланган.

Манбага кўра, футболчи ушбу ҳодисадан сўнг клуб раҳбариятига фаолиятини якунлаш ниятида эканини билдирган. Расмий эълон яқин кунларда берилиши кутилмоқда.

Оскар Хитойда қарийб саккиз йил тўп суриб, ўтган йилнинг декабрь ойида уч йиллик шартнома асосида “Сан-Паулу” сафига келиб қўшилган эди. Фаолияти давомида у “Челси” сафида 203 та ўйинда 38 та гол урди, икки марта АПЛ чемпиони, шунингдек, Европа лигаси ва Лига Кубоги соҳибига айланди. 2017 йилда у Хитойнинг “Шанхай СИПГ” клубига кўчиб ўтган.

Эндиликда “Сан-Паулу” клуби Оскар ва унинг тиббий жамоаси билан биргаликда расмий нафақага чиқиш баёнотини тайёрламоқда.