Пашинян Путинга КХШТ устидан шикоят қилди

Арманистон Бош вазири Никол Пашинян Ереван Коллектив хавфсизлик шартномаси ташкилоти (КХШТ) ишида иштирок этмаётганини, чунки ташкилот Тоғли Қорабоғдаги вазиятга нима учун аралашмаганини ўз фуқароларига тушунтириб беролмаслигини маълум қилди. Бу ҳақда у кеча, 1 апрель куни Москвада Россия Президенти Владимир Путин билан учрашувда гапирди.

“КХШТ билан боғлиқ муаммоларимизни ҳам ҳеч қачон яширмаганмиз, чунки 2022 йилда бизда аниқ вазият юзага келган эди ва менимча, КХШТ механизмлари ишлаши керак эди, лекин улар ишламади. Бу эса, албатта, КХШТ билан муносабатларимиздаги ҳозирги ҳолатга олиб келди. Биз ҳозир КХШТ ишида оддий сабабга кўра қатнашмаяпмиз: биз ҳалигача халқимизга, фуқароларимизга нима учун КХШТ реакция билдирмаганини ва Коллектив хавфсизлик шартномасидаги мажбуриятларга зид равишда ҳаракат қилмаганини тушунтириш ҳолатида эмасмиз”, дейди Пашинян.

Путиннинг таъкидлашича, Ереваннинг ўз позицияси туфайли ташкилотнинг низога аралашиши ноўрин бўлар эди.

“Шу нарса аёнки, 2022 йилда Прагада Қорабоғ Озарбайжоннинг бир қисми эканлиги тан олинганидан кейин, КХШТ томонидан Озарбайжон ички масаласига айланган ушбу жараёнга аралашиш мутлақо ноўрин бўлар эди”, дейди Путин. 

Унинг сўзларига кўра, Қорабоғни Арманистоннинг бир қисми деб тан олишда “мантиқ бор эди”. Шу билан бирга, Россия Президенти бундай қарорга баҳо беришдан тийилган.

Учрашувда иқтисодий муносабатлар ҳам муҳокама қилинган. Пашинян Арманистон бир вақтнинг ўзида ҳам Европа Иттифоқи Божхона иттифоқида, ҳам Евроосиё иқтисодий иттифоқида бўла олмаслигини тушунишини айтган. Путин икки давлат ўртасидаги иқтисодий алоқалар яхши суръатлар билан ривожланаётганини, Россияда 2 миллиондан ортиқ арман яшашини қайд этган.

Эслатиб ўтамиз, 2024 йил февраль ойида Арманистон КХШТдаги аъзолигини музлатишини эълон қилган, кейинроқ ташкилотнинг Тоғли Қорабоғдаги вазиятга муносабат билдирмаганини сабаб қилиб, аъзолик бадалларини тўлашдан бош тортган эди. 2025 йил 1 октябрда Пашинян Арманистон амалда КХШТдан мустақил бўлганини айтиб, ташкилот хавфсизлик тизимини “пуфак” деб атаган.

2025 йил 27 ноябрда Путин Арманистон ўзини КХШТнинг бир қисми деб ҳисоблашини, аммо ташкилот тадбирларида қатнашишдан тийилиб, унинг барча қарорларини қўллаб-қувватлаётганини таъкидлаган эди.