Пекин-Берлин янги беш йилликда “бир тан-у бир жон” бўлмоқчи

Хитой Бош вазири Ли Цян Пекинда Германия канцлери Фридрих Мерц билан музокаралар чоғида икки давлат ўртасидаги иқтисодий шериклик янги босқичга чиқишини маълум қилди. Пекинда 15-беш йиллик дастур бошланаётган бир пайтда савдо ва инвестиция соҳасидаги имкониятлар кенгайиши кутилмоқда. Бу ҳақда “Синьхуа” ёзди.

Учрашувда анъанавий тармоқлар – автомобилсозлик ва кимё саноати билан чекланиб қолмасдан, сунъий интеллект ва биофармацевтика каби юқори технологияли йўналишларга урғу берилган. Пекин немис маҳсулотлари импортини оширишга тайёрлигини билдирган, шу билан бирга ХХР компаниялари учун ГФРда барқарор ва адолатли иш муҳити муҳим эканини очиқ айтган. Илмий тадқиқот, кадрлар тайёрлаш ва инновация натижаларини бозорга чиқариш масалалари ҳам кун тартибидан жой олган.

Берлин ҳам иқтисодий алоқаларни мувозанатли ва узоқ муддатли асосда ривожлантириш тарафдори. Мерц яшил иқтисодиёт ва иқлим ўзгаришига қарши курашни устувор йўналиш сифатида тилга олган. Германия Европа Иттифоқидаги ўрнини ҳисобга олган ҳолда, Брюссель–Пекин муносабатларига ижобий таъсир кўрсатишга тайёрлигини қайд этган.

Музокаралар якунлари яшил трансформация, божхона, спорт ва медиа соҳаларидаги келишувлар билан мустаҳкамланган. Хитой раҳбари Си Цзиньпин эса глобал вазият кескинлашган шароитда стратегик ишонч ва очиқ мулоқот ҳар қачонгидан муҳимроқ эканини урғулаган. Унинг фикрича, Пекин ва Берлин ишончли шерик, инновацион ҳамкор ва маданий яқинлашув тарафдори сифатида ҳаракат қилса, икки томонлама муносабатлар янги босқичга кўтарилади.

Эслатиб ўтамиз, бугун, 25 февраль куни Германия канцлери Фридрих Мерц Хитойга уч кунлик расмий ташриф билан боргани олдинроқ айтилган эди.