Прокурорлар Юн Сок Ёлга ўлим жазоси сўради

Бугун, 13 январь куни Сеул Марказий округ суди ҳайъати махсус прокурори Чо Ин Сокнинг жазо бўйича талабини тинглаш учун қўшимча мажлиси бўлиб ўтди. Унда прокурорлар Жанубий Корея собиқ президенти Юн Сок Ёлга мамлакатда ноқонуний ҳарбий ҳолат жорий этгани учун ўлим жазосини сўради. Тергов, шунингдек, унга “душманга кўмаклашиш” бўйича айбловларни ҳам кўриб чиқмоқда. Бу ҳақда “Yonhap News” хабар берди.  

Нашрга кўра, мазкур иш бўйича судланувчилар орасида собиқ президент билан бирга яна етти нафар шахс бор. Жорий йилнинг 9 январь куни суд мажлиси вақтинча тўхтатилганди. Бунга собиқ мудофаа вазири Ким Ён Хён адвокатларининг ҳужжатли далилларни ўрганишга саккиз соат сарфлагани сабаб бўлган. 

Маълумот учун, Юн Сок Ёль Жанубий Кореяда қамоқда сақланган ҳолда айблов эълон қилинган илк амалдаги президент бўлди. У собиқ мудофаа вазири ва бошқа шахслар билан тил бириктириб, конституциявий тузумни издан чиқариш мақсадида исён уюштиришда айбланмоқда.

2024 йил 3 декабрь куни Юн Сок Ёль фавқулодда мурожаат билан чиқиб, мамлакатда ҳарбий ҳолат жорий этилганини эълон қилган. У бу қарорни “Шимолий Кореяга мойил, давлатга қарши кучларга қарши туриш зарурати” билан изоҳлаган. Консерваторлар бу атама билан Шимолий Корея билан мулоқотни қўллаб-қувватловчи “Тобуро” мухолифат партиясини назарда тутади. Кейинчалик Миллий Ассамблея бу қарорни бекор қилиб, Юнни лавозимидан четлатган.

Шунингдек, нашр 2025 йилнинг ноябрь ойида Юн Сок Ёлга янги айбловлар қўйилгани ҳақида ёзган. Улар орасида “душманга кўмаклашиш” моддаси ҳам бор бўлиб, у Шимолий Кореяга учувчисиз учиш аппаратлари юборилгани билан боғлиқ. 

Эслатиб ўтамиз, жорий йил 9 январь куни Сеул судида Юн Сок Ёлга нисбатан 2024 йилда ҳарбий ҳолат жорий этишга уриниш бўйича қўзғолон уюштирганлик айби билан олиб борилаётган иш доирасидаги якуний суд мажлиси бошланганди.  

2025 йилнинг 26 декабрь куни эса собиқ президент Юн Сок Ёль фаолиятини тергов қилаётган махсус прокуратура жамоаси унга нисбатан 10 йилга озодликдан маҳрум этиш жазосини сўраганди.